Депутаттар қыз алып қашуға үндейтін шығармалар бойынша келіспей қалды

АСТАНА, 15 қазан – Sputnik. Мәжіліс депутаттары қыз алып қашуға үндейтін шығармалар бойынша келіспей қалды, деп хабарлайды Sputnik Қазақстан тілшісі.

Бүгін төменгі палатаның отырысында депутат Мұрат Әбенов қыз алып қашуға қатысты жазаның енгізілгенін еске салды. Бірақ теледидарда қыз алып қашуға үндейтін сериалдар бар.

"Кеше ұлттық арнада бір кино болып жатыр. Сериал. Сонда "көнбесең, алып қашамын" дейді. Ештеңе қылмайды, мен де алып қаштым, аман-есен жүрміз дейді. Бұл не сонда? Ұлттық арна мемлекеттік саясатқа қарсы ма?", - деді Әбенов.

Мәдениет және ақпарат вице-министрі Қанат Ысқақовтың айтуынша, ондай фактілер болса, нақты шара қолданылады.

"Егер ол біздің отандық сериал болса, шара қолдана аламыз. Ал шетелдік сериал болса, эфирге жолатқызбаймыз", - деді вице-министр.

Ал депутат Ринат Зайытов көркем шығармаларда қыз алып қашу әңгімесін қалай реттеуге болатынын түсінбей дал болды.

"Біз ертең "Мен жасымда, жігіттер, топтан астым, бір күнде сегіз қызды алып қаштым" деп ән айтқандарды соттап жібермейміз бе? "Егер мені шын сүйсең асыл еркем, ертең кешке дайын тұр қашуыңа -ай!" деген халық әні бар. Сонда көркем шығармаларды қалай қорғаймыз? Ертең Ақселеу ағамыздың "Бейпіл сөздерін" оқи алмай, фольклорымыздан айырылып жүрмейік", - дейді Зайытов.

Вице-министр Қанат Ысқақов заңға қайшы келмейтін шығармашылық бостандыққа ешкім шектеу қоймайды деп отыр. Оған қоса, сюжет сақталуы керек.

"Әрине, сюжет бар, онда мен сені алып қашамын десе, ал қыз бала келісетін болса, ешқандай жазалау жоқ. Ал заңға қайшы болса, біз режиссерлік топқа сюжетті түзетуге кеңес береміз. Бірақ жазаға тарту немесе соттау деген әңгіме жоқ", - дейді Ысқақов.

Ал мәжіліс спикері Ерлан Қошанов "ондай әндерді айту үшін Иманжүсіп болу керек қой" деп қалжыңдады.