Дубай әлемнің жетекші туристік бағыттарының үштігіне енеді

Алдын ала брондау деректеріне негізделген есепке сәйкес, биылғы жылдың осы кезеңімен салыстырғанда Дубайға ағылған туристер саны 6 пайызға артқан. Бұл көрсеткіш қаланың жаһандық туризм, демалыс және бизнес орталығы ретіндегі орнын одан әрі нығайтып отыр.

ForwardKeys сарапшыларының айтуынша, Дубай әлемнің түкпір-түкпірінен келетін туристерді барған сайын көбірек тартып отыр. Биылғы жылдың соңғы үш айында дүниежүзілік халықаралық сапарлардың шамамен 2,2%-ы дәл осы қалаға тиесілі болмақ.

Талдау нәтижелері Үндістан мен Ұлыбританияның Дубай үшін ең ірі туристік нарығы ретінде сақталып отырғанын көрсетеді. Ал Қытай бағытынан келушілер саны айтарлықтай өсіп, бір жыл ішінде брондау көлемі 34%-ға артқан. Осылайша Қытай қайтадан қаладағы ең жиі келетін он нарықтың қатарына енді.

Сондай-ақ, Германиядан келетін туристер саны да 9%-ға өскен, бұл Дубайдың еуропалық және азиялық нарықтар үшін де тартымдылығының артқанын көрсетеді.

Туристердің күрт артуы жыл сайынғы қысқы маусыммен тұспа-тұс келіп отыр. Бұл кезең дәстүрлі түрде Дубайға ең көп турист тартатын уақыт болып саналады. Қаланың дамыған инфрақұрылымы, алуан түрлі демалыс орындары мен әлемдік деңгейдегі іс-шаралары оның жетекші туристік бағыт ретіндегі мәртебесін нығайта түскен.

Дубайдың Экономика және туризм департаментінің мәліметінше, 2025 жылдың алғашқы жеті айында қалаға келген шетелдік туристер саны 11,17 миллион адамға жеткен. Бұл өткен жылдың дәл осындай кезеңімен салыстырғанда 5%-ға көп (2024 жылы — 10,62 млн).

Сарапшылар Дубайдың тұрақты өсімі оның тұрақтылығы мен тартымдылығын, сондай-ақ қаланың инновациялар, мәдениет пен жоғары деңгейдегі қонақжайлықты ұтымды үйлестіре отырып, өзін жаһандық деңгейдегі үздік туристік бағыт ретінде табысты қалыптастыра алғанын көрсетеді.

Бұған дейін хабарланғандай, Дубайда әлемдегі ең биік қонақүй ашылады.