Дубайда Тұмар инновациялық хабы құрылды

Дубайда Қазақстан мен Өзбекстанның ортақ инновациялық хабы құрылды. Қос ел бірлесіп қолға алған бастама аясында Орталық Азия стартаптары Таяу Шығыс нарығында кең танылып жатыр. Алғаш болып іске қосылған 10 жоба әмірліктің «Expand Norht Star» көрмесінде көпшілік назарына ұсынылды. «Тұмар» атты жаңа платформа бауырлас  елдердің технологиялық тұрғыдағы озық шешімдерін бір жерге топтастырып, ірі қалалардың тыныс-тіршілігіне еркін енуін қамтамасыз етеді. Заңнамалық тұрғыда көмек береді. Бастысы инвестор тартуға септігі мол. Жобаға Дубайдың халықаралық инновациялар орталығы қолдау көрсеткен. Ол еліміздің «Astana hub» мекемесімен тікелей байланыста. Тараптар алдағы уақытта өзара ынтымақтастықты тереңдетіп, жаңа стартаптарды көптеп іске қосуға ниетті.

Таңат Өскембаев, «Astana Hub» атқарушы директоры:

- Қолдауын алып жатырмыз. Олар өздері айтып жатыр, бізге жаңа таланттар керек. Олар біздің стартаптарға инвестиция бөлуге дайын. Сондықтан көптеген жақсы жағдай жасап жатыр. Сондықтан осы жерге келіп хаб ашып жатырмыз. Қазір 10 стартап сол акселерациядан өтіп жатыр. Олар бір-екі аптадан кейін өз бағдарламасын аяқтайды.

Айта кетейік, араб жеріндегі инновациялық хабта қазір қазақстандық 5 жоба сәтті сыналып жатыр. Тіпті кейбірі біршама пайда әкеле бастаған. Жоба жетекшілері осы үрдісті тоқтатпай, саладағы көшбасшы атануды көздеп отыр. Дубай, Абу Даби секілді ірі қалаларда мұндайға мүмкіндік баршылық. «Түптеп келгенде, бұл жағдай еліміздің айти экспортын ұлғайтуға сеп болады», - дейді мамандар.

Марат Шотанов, стартап жобаның негізін қалаушы:

- Маусым айында қосымшамызға алғашқы қолданушыларды тарта бастадық. Қазір Дубай бойынша ең танымал оншақты мекенжайда платформа жұмыс істеп тұр. Бос автотұрақты онлайн түрде анықтайтын жүйенің белсенді 1500 қолданушысы бар. 4 ай ішінде 3 мың долларлық табысқа шықтық. Жыл соңына қарай әмірліктегі 50-ге тарта мекенжайды қамтуды көздеп отырмыз. Сол кезде біздің қосымшаны 5 мыңдай адам пайдаланатын болады.