​Джеки Чан Маңғыстауда Құдай сауыты фильмінің жалғасын түсіруі мүмкін

Әлемге әйгілі актер Джеки Чан Маңғыстауда жаңа фильм түсіруі мүмкін. «Құдай сауыты» 4: Ultimatum» жобасының тобы Ақтауға келіп, қала мен өңірдің табиғи көріністерін зерттеуді бастап кеткенін Lada.kz Маңғыстау облысы туризм басқармасына сілтеме жасап хабарлады.  

1986 жылы шыққан «Құдай сауыты» («Доспехи Бога») » франшизасы Джеки Чанның ең танымал туындыларының бірі саналады. Оны бірнеше онжылдықтан кейін қайта жалғастыру – бүкіл әлемдегі көрермендер үшін үлкен жаңалық. Ал Маңғыстауды түсірілім алаңы ретінде таңдау – Қазақстан киноиндустриясы үшін маңызды оқиға болмақ.  

Ақтауға келген күні түсірілім тобы облыс әкімімен кездесіп, ұйымдастыру мәселелерін және түсірілімге қолдау көрсету шараларын талқылады.  

Егер жоба толық мақұлданса, Маңғыстау алғаш рет Джеки Чан қатысатын ірі халықаралық экшн-фильмнің бір бөлігіне айналады.  

Айта кетейік, өңірдің табиғаты шетелдік қонақтарды жиі таңғалдырады. Мысалы, әзербайжандық әнші әрі кәсіпкер Emin Маңғыстау пейзаждарын «ертегіге ұқсас» деп сипаттаған. Ал башқұрттың «Ay Yola» тобы Бозжыра шатқалында түсірілген «Yola» әніне клип шығарған.  

Бүгін, 16:49