Екі алпауыт арасындағы сауда дауы: Қытай АҚШ ты диалогқа шақырды

Қытай Сауда министрлігі жексенбі күні елдегі сирек кездесетін металдар мен соларға қатысты тауарларға қойылған экспорттық бақылау заңды екенін айтты. Олар АҚШ-ты өзара құрмет пен теңқұқық негізінде келіссөз жүргізіп, мәселелерді шешуге шақырды.

Министрлік өкілінің айтуынша, Қытай — жауапты үлкен мемлекет ретінде әлемдегі бейбітшілікті сақтау, аймақтық тұрақтылықты қамтамасыз ету және ядролық қаруды таратпау сияқты халықаралық міндеттерін орындау үшін экспорттық бақылауды заң бойынша жүргізеді.

— Қытайдың экспорттық бақылауы — бұл экспортқа тыйым салу емес, — деді ресми өкіл.

Оның айтуынша, тиісті талаптарға сай өтініштер бойынша экспорттық лицензиялар берілетін болады.

Ресми өкілдің сөзінше, Қытай бұл шараларды жарияламас бұрын қос тарапты экспорттық бақылау диалогі тетіктері арқылы тиісті елдер мен аймақтарға алдын ала хабарлаған.

Ол Қытайдың басқа елдермен экспорттық бақылау саласында диалог пен пікір алмасуды арттыруға дайын екенін айтып, бұл жаһандық өндіріс пен жеткізу тізбектерінің қауіпсіздігі мен тұрақтылығын жақсырақ қамтамасыз етуге бағытталғанын жеткізді.

АҚШ тарапынан енгізілген жаңа шаралар туралы

Қытай Сауда министрлігінің өкілі АҚШ-тың Қытай өнімдеріне 100 пайыздық кедендік тарифтер енгізуі және барлық стратегиялық бағдарламалық қамтамасыз етуге экспорттық бақылау енгізу туралы мәлімдемесіне қатысты пікір білдірді.

Айтуынша, АҚШ ұзақ уақыт бойы ұлттық қауіпсіздік түсінігін асыра бағалап, экспорттық бақылау шараларын теріс пайдаланып, Қытайға қарсы дискриминациялық іс-әрекеттер жасаған және біржақты түрде «ұзын қол» құқығын қолдана отырып, жартылай өткізгіш жабдықтар мен чиптер сияқты түрлі өнімдерге шектеулер қойған.

Мәселен, қыркүйек айында Мадридте өткен Қытай-АҚШ сауда-экономикалық келіссөздерінен кейін АҚШ небәрі 20 күн ішінде Қытайға қарсы жаңа шектеу шараларын енгізді. Ресми өкіл айтып өткендей, американдық тараптың әрекеттері Қытайдың мүдделеріне елеулі зиян келтіріп, екіжақты сауда-экономикалық келіссөздердің ахуалын күрт нашарлатқанын және Қытай бұған қатты қарсылық білдіретінін ерекше атап көрсетті.

— Жоғары кедендік баж салықтарымен қорқыту — Қытаймен қарым-қатынас орнатудың дұрыс жолы емес. Қытайдың тарифтік соғыстарға қатысты ұстанымы өзгермейді: Қытай мұндай соғыстарды қаламайды, бірақ олардан қорықпайды, — деді ол.

Қытайдың АҚШ-қа үндеуі

Қытай АҚШ-ты өздерінің қате тәжірибесін дереу түзетуге, екі ел басшылары арасындағы телефон арқылы болған маңызды келісімдерді ұстануға, келіссөздер арқылы қол жеткізілген нәтижелерді қорғауға, Қытай мен АҚШ арасындағы сауда-экономикалық консультациялар механизмін қолдануды жалғастыруға, бір-бірінің алаңдаушылықтарын шешуге және өзара құрмет пен тең құқықты кеңес негізінде диалог арқылы келіспеушіліктерді тиісті түрде реттеуге шақырады. Қытай Сауда министрлігінің ресми өкілі бұл қадамдар қытай-американ сауда-экономикалық қатынастардың тұрақты, ақылға қонымды әрі ұзақ мерзімді дамуын қамтамасыз етуге бағытталғанын алға тартты.

— Егер АҚШ қате жолмен жүруді жалғастыра берсе, Қытай заңды құқықтары мен мүдделерін қорғау үшін батыл шаралар қабылдайды, — деп түйіндеді министрлік өкілі.

Еске салсақ, тамыз айында АҚШ апелляциялық соты Трамп тарифтерінің көпшілігін заңсыз деп тапты.

Дегенмен жақында АҚШ президенті Дональд Трамп 1 қарашадан бастап Қытайдан келетін тауарларға кедендік баж салығын екі есе арттыруды және экспорттық шектеулер енгізуді жоспарлап отырғанын мәлімдеді.

Кейіннен Трамптың Қытаймен сауда қақтығысы туралы мәлімдемесі криптовалюта нарығын құлатқаны анықталды.