Экономикада өсім әсері байқала бастады

«Tengenomika» телеграм-арнасы­ның зерттеуіне сүйенсек, ел экономикасында халықтың күнделік­ті өміріне әсер ететін нақты өзгерістер байқалған. Ішкі жал­пы өнім 7 айда 6,3 пайызға өс­кен. Бірақ ең маңыздысы сан емес, өсім­нің халық тұрмысына қа­лай әсер еткенінде болып отыр.

Суретті түсірген – Ерлан ОМАР, «ЕQ»

Кейінгі  жылдары ел ішінде қозғалыс күшейді. Адамдар жиі сапарлайды. Көбірек демалып, қызмет көрсетуге жиі жүгінеді. Бұрын 6 миллион 600 мың адам саяхаттаса, қазір 10 миллион 500 мың адам ел ішінде демалған. Шетелге шы­ғатындар да үш есе өсіп, 1 миллион 190 мың адамға жетті. Әуе тасымалы да артты. Қазір жылына 14 миллионнан астам адам ұшақпен жүреді. Такси қызметін қолданатындар саны да айтарлықтай өсті. 2018 жылы 54 миллионнан астам адам такси қолданса, былтыр бұл көрсеткіш 73 миллион адам болды.

«Экономика сан үшін емес, адам үшін жұмыс істеуі керек. Егер халық еркін жүрсе, демалса, табысын еркін жұмсаса, міне, осы нағыз өсім. Кейінгі жылдары отан­дастарымыз дәл осындай мүмкіндікке ие бола бастады. Бұл елдің дамуы дұрыс бағытта екенін көрсетеді. Әсіресе адамдардың демалысқа жиі шығып, сапалы қызметтерге жүгінуі сенімнің артқанын білдіреді», деп жазылған зерттеуде.

Тұрғын үй алушылар қатары да көбейген. 2020 жылы 3 миллион 854 мың адамның жеке баспанасы болса, 2024 жылы бұл көрсеткіш 4 миллион 983 мың адамға жетті. Яғни 5 жылда 1 миллионнан астам адам үй алған. Сонымен қатар елде тұтыну мәдениеті де өзгеріп жатыр. Адамдар сапалы тағамға көбірек көңіл бөледі. Ет пен жемісті жиі тұтынады. Әлеуметтік топтарға арналған азық себетіне де 20 тауардың орнына 43 атау енгізілді.

Инфографиканы жасаған – Зәуреш Смағұл, «ЕQ»

Қала мен ауылда инфрақұ­рылым жаңарып келеді. Газ тарту, жарық орнату, жол жөн­деу, аулаларды жақсарту сияқ­ты жұмыстар жүйелі жүріп жатыр. Әсіресе өңірлер­дегі өзгеріс айқын сезіледі. Көп жыл күткен әлеуметтік жақ­сартулар іске аса бастады. Бұл өмір сапасына ықпал етіп отыр. Экономиканың көлемі артқанымен, басты назар енді оның сапасына ауып келеді. Қазіргі міндет тек өсу емес, сол өсімнің әр адамға әсерін күшейту.

«Инфрақұрылым жақсар­са, қоғамдық көңіл күй де өзгереді. Жарығы бар көше, таза аула, тегіс жол, жылы үй, міне, адамға ең керегі – осы. Экономикалық өсім дегеніміз тек өндіріс емес, ең алдымен тұрмыс сапасының артуы. Қазір осыны көріп отырмыз. Жұрт еркін қозғалады. Қызмет қолжетімді. Болашақта ең маңыздысы өсімнің өзін емес, оның қайда жұмсалғанын бақылау болады. Ел дамуы жұрттың өмірінде көрінсе, еңбектің нәтижесі сонысымен бағаланады. Біз бүгін осы кезеңге өтіп келеміз. Қара­пайым адамның мүмкіндігі кеңейіп, өмір сапасы артып жатыр», деп түйіндеді арна сарапшылары.