Экономикаға байыпты көзқарас керек

Qazaq24.com, Egemen.KZ дереккөзінен алынған ақпаратқа сүйене отырып мәлімет бөліседі..

Премьер-министр Олжас Бектенов экономикалық блок сарапшыларымен кездесу өткізді. Басқосу барысында елдің экономикалық даму келешегі, басым салаларды өркендету жолдары мен сыртқы тәуекелдер талқыланды.

Жиында Үкімет басшысы орнықты экономикалық өсуді қамтамасыз ету мен халықтың нақты әл-ауқатын арттыру басым міндет болып қала беретінін атап өтіп, сараптама мен кеңестер алуға жұмыс тәсілдерін жан-жақты талқылау бойынша кездесулердің маңыздылығына тоқталды.

Кездесу барысында сарапшылар қауымдастығының өкілдері экономикалық өсудің негізгі мәселелері мен бағыттарына өз бағасын берді. Сарапшылар сондай-ақ жаһандық үдерістер мен әлемдік конъюнктураның ықпалын ескере отырып, ұлттық экономиканың даму қарқынына қатысты болжамын айтты. Салалық жаңғыртудың басымдықтары, нарықтың неғұрлым өзекті сұраныстары әрі олармен технологиялық бастамаларды өзара байланыстыру жөнінде ұсыныстар айтылды. Инфляцияға қарсы күрес шаралары, отандық өндірісті ұлғайту, салықтық әкімшілендіруді жетілдіру, ЖИ-ді дамытуға электр энергиясын өндіру, инвестициялар тарту мәселелері талқыланды.

Салық реформасын талқылау кезінде өтпелі кезеңнің маңыздылығы атап өтілді. Үкіметтің шешіміне сәйкес ҚҚС бойынша есепке қою шегінен асқан салық төлеушілер әкімшілік жауапкершілікке тартылмайды. Салықтар бойынша өсімпұлдар мен айыппұлдар қарыздың негізгі сомасы 2026 жылғы 1 сәуірге дейін өтелген жағдайда есептен шығарылады.

Кездесуді қорытындылаған Премьер-министр Үкімет пен сарапшылар қауымдастығы арасындағы тұрақты диалогтің маңыздылығын атап өтіп, жауапты мемлекеттік органдарға айтылған ұсыныстарды пысықтауды тапсырды.