Елде 12 халықаралық көлік дәлізі бар

2030 жылға дейін 5 мың шақырым шойын жол төселіп, 11 мыңы жөнделеді. Бұл жайлы биылғы сұхбатында Мемлекет басшысы баса айтты.

Меже орындалса тозған темір жолдар жаңғырып, тасымалдау ісі қарқын алады. Сондай-ақ вокзалдар мен жүк және жолаушы вагондарын жаңарту да жалғасын табады. Салада тағы қандай жаңалық бар?

Алтай мен Атыраудың арасындағы атырап. Еуропа мен Азияны жалғаған жол. Иә, Қазақстан құрлықтың қақ ортасында орналасқан. Содан болса керек еліміз арқылы өтетін күре жол көп. Сандарды сөйлетсек, Қазақстанда 12 халықаралық көлік дәлізі бар. Оның бесеуі темір жол, жетісі автокөлік бағыттары. Қытай мен Еуропа арасында құрлықпен жеткізілетін жүктің 85 пайызы осы жолдармен жеткізіледі. Яғни тасымалдау ісінде тыңнан түрен салуға болады. Мұны Мемлекет басшысы айтты.

12 халықаралық дәліз

Темір жол - 5

Автожол - 7

Қасым-Жомарт Тоқаев, Қазақстан Республикасының Президенті:

- Еліміз үшін көлік-логистика саласының әлеуетін арттыру – стратегиялық маңызы бар міндет. Теңізге тікелей шығатын жолы болмаса да, Қазақстан Еуразия құрлығының кіндік тұсында, яғни негізгі транзиттік күре жолдар тоғысқан жерде орналасқан. Бұл – үлкен артықшылық, біз оны ел игілігіне жарата білуге тиіспіз. Мақсат-мүддемізге сәйкес Қазақстанды Еуразияның көлік айлағы хабы ретінде қалыптастыру – бұл салада атқарылатын жұмыстың басты бағыты.

11 мың шақырым темір жол жөнделеді

Теміржол тасымалына тоқталайық. Былтыр шойын жол арқылы 318 млн тонна жүк жеткізілді. Ал биыл бұл көрсеткішті 327 млн тоннаға көбейту жоспарланып отыр. Ол үшін жаңа бағыттар салынып, тозған жолды жаңғырту маңызды. Айталық, 2025 жылы 1,5 мың шақырым шойын жол жөнделді. Биыл тағы 1,6 мың шақырым жол жаңарады. Бас-аяғы бес жылдың бедерінде 11 мың жол жаңғыртылады. Сондай-ақ 5 мың шақырым болатын жаңа бағыттар ашылады. Бұдан бөлек заманауи вагондар сатып алынады.

2025 жылы - 318 млн тонна

2026 жылы - 327 млн тонна

Былтыр - 1,5 мың км

Биыл - 1,6 мың км

Жәнібек Тайжанов, ҚР Көлік вице-министрі:

- 236 локомотив, 1,4 мыңнан астам жүк және заманауи 191 жолаушылар вагонын жеткізу жоспарланып отыр. Сонымен қатар Халықаралық көлік дәліздері де Транскаспий халықаралық көлік бағыты мен Солтүстік – Оңтүстік бағыты беленді дамуда. Транскаспий бағытының өткізу мүмкіндігін арттыру үшін порттар инфрақұрылымын жаңғырту жобалары іске асырылуда. Сауда флоты 4 пароммен толықтырылады.

Елдегі 124 вокзал жөнделеді

Сонымен қатар елдегі 124 вокзал жөндеуден өтеді. Қазірдің өзінде 46-ның құрылысы аяқталады. Меже орындалса жыл соңына дейін темір жол бекеттері 100 пайыз жаңарады.

Авторы: Шернияз Жалғасбекұлы