Елдегі 90 мың баланың тілінде мүкістік бар

Елімізде ерекше білімді қажет ететін 235 мың бала бар болса, оның 90 мыңға жуығы дұрыс сөйлей алмайды, деп хабарлайды 24KZ. Ал елдегі әрбір үшінші отбасындағы бүлдіршін логопед көмегіне зәру. Статистика көңіл көншітпейді. Себебі бұл сандар тиісті мамандардың маңызын айшықтап тұр. Ал еңбек нарығындағы жағдай қандай? Логопед пен дефектологтардың тапшылығы расында байқала ма?

Дарина Қайырованың ұлы 6 жаста. Алғаш рет 3 жасында баласының тілінде мүкістігі барын байқапты. Дабыл қаққан ана бірден тиісті дәрігерлерге жүгінген. Кейін нұсқама бойынша логопед-дефектологты іздей бастаған. Алайда өз қаласынан білікті маман таппай, Астанаға көшуге бел буады. Қазір ұлы елордадағы арнайы балабақшалардың біріне барып жүр.

Дарина Қайырова, қала тұрғыны:

- Ұлымның дұрыс сөйлей алмайтыны анықталды. Біз ойланбастан Астанаға көшіп, осында жақсы балабақша таптық. Өзге қалада жан-жақта орналасқан түрлі мамандарға барып, табан тоздыратын едік. Астанаға қоныс аударып, қазір білікті мамандармен жұмыс істеп жүрміз. Бүгінде ұлымның ой-өрісі мен сөйлеу қабілеті жақсарды. Тіпті сөйлем құра алады. Әрине, мұндай жетістікке білікті психолог, логопед, дефектологтардың септігі зор.

«Мұндай балаларға арналған емдік шаралардің ақысы қалтаны қаққанымен, оның әрбір тиыны ақталады», – дейді ата-ана. Бұл балабақшада логопед-дефектологтан бөлек, психолог, басқа да ем өткізетін мамандар жұмыс істейді. Әр балаға, диагнозының күрделілігіне байланасты арнайы емдеу әдісі қолданылады.

Гүлмира Акишева, логопед-дефектолог:

- Ғалым Рауф ғалымның шығарған зонтын, әдістерін қолданамын. Әртүрлі жаттығулар жасаймыз, артикуляциялық гимнастика, тіл мен бұлшық еттерді күшейтуге арналған арнайы жаттығу. Әртүрлі саусақ ойындары және қарапайым сөздік ойындары, баламен сондай сабақтар жүргіземіз. 2 жаста бала толық сөйлем, 1-2 сөзден сөйлем айта алуы керек. «Су бер, су ішемін, тамақ жеймін, мама, далаға шығайық», – деп сөйлемдерді қоса білуі керек. 

Балабақша меңгерушісі қазір логопед-дефектологтардың тапшылығы барын айтады. «Ол нарықта сезіліп тұр», – дейді.

Саида Шекербек, түзету-дамыту балабақшасының меңгерушісі:

- Шыны керек, логопед маманын, білікті маман табу өте қиын. Біз мына балабақшаны ашқан кезде қиналдық, таба алмадық. Бірақ қазіргі таңда біз 2 мықты деген логопед-дефектологты таптық. Сол кісілер балалармен жұмыс жасайды.

1 жастағы баланың сөздік қорында қарапайым «әке, ана, ата-әже» секілді кем дегенде 5-10 сөз болуы керек. Дегенмен соның өзін айта алмай, баласының тіл қатпайтынына шағымданатын ата-аналар көбейіп барады. Бүгінде республика бойынша ерекше білімді қажет ететін 235 мың бала бар. Оның 90 мыңға жуығының тілінде мүкістігі бар. Яғни бұл сандар логопед пен дефектологтардың маңызын айшықтап тұр.

Авторлары: Альмира Оразбай, Диас Ковланбев