Елімізде тұрғындардың қанша пайызы балалар?

Қазақстан туу туралы актілерді тіркеу көрсеткіші (100 пайызға жуықтаған) ең жоғары елдердің бірі ретінде бала құқықтарын қорғау жөніндегі халықаралық стандарттарға толық сәйкес келіп отыр, деп жазады Egemen.kz.

Фото: Oqu-agartu ministrligi

Елімізде балалар халықтың үштен бірін – 34 пайызын құрайды, әрі бұл көрсеткіш жылдан-жылға тұрақты өсіп келеді.

Мемлекеттік саясаттағы басым бағыттардың бірі – балаларға ұзақ мерзімді қаржылық қолдау көрсету. Қазақстан – табиғи ресурстардан түсетін табыстың бір бөлігін тікелей балалардың игілігіне бағыттайтын сирек елдердің бірі. 2024 жылдан бастап «Ұлттық қор – балаларға» бағдарламасы аясында қордың инвестициялық табысының 50 пайызы кәмелетке толмаған азаматтардың жеке жинақ шоттарына аударылып келеді. 2025 жылы әр балаға шамамен 130 АҚШ доллары көлемінде қаражат бөлініп, 324 мыңнан астам баланы қамтыған. Екі жыл ішінде бір балаға шаққанда жиналған орташа сома 233 АҚШ долларын құрады.

Оқу-ағарту министрлігінің мәліметінше, 2023 жылдан бастап барлық бастауыш сынып оқушылары 100% тегін ыстық тамақпен қамтылып, 1,7 миллионнан астам баланы қамтыған және балабақшаларда 953 мың тәрбиеленуші тегін тамақпен (бюджеттерден 207,4 миллиард теңге бөлінді) қамтамасыз етілді.

ЮНИСЕФ жүргізген 2024 жылғы MICS зерттеуінің нәтижелері бойынша, Қазақстандағы балалардың тамақтану көрсеткіштері Еуропа мен Орталық Азия елдерінің деңгейіне сай келеді. Сарапшылар бұл көрсеткіштердің тұрақтылығын және күрт ауытқулардың болмауын ерекше атап өтті.

Балалардың қауіпсіздігін қамтамасыз ету мақсатында елімізде заңнамалық база да нығайтылды.

«Заң баланы толық қорғауы тиіс. Біз бұл қорғау шынайы әрі тиімді жұмыс істеуі үшін нақты шаралар қабылдап жатырмыз. Әрбір бала мемлекеттен тең мүмкіндік пен сенімді қолдау алуы керек. Өйткені бұл – еліміздің болашағын қалыптастыратын берік негіз», деді Оқу-ағарту министрлігіне қарасты Балалардың құқықтарын қорғау комитетінің төрағасы Насымжан Оспанова.

2026 жылдан бастап елімізде балаларды қолдау мен дамытуға бағытталған барлық шараларды біріктіретін «Қазақстан балалары» атты бірыңғай ұлттық бағдарлама іске қосылады. Бұл бағдарлама баланың өмірлік жолының барлық кезеңін қамтитын кешенді ұлттық стратегияға айналмақ.