Елорда тұрғыны Оңтүстік Кореядан көлік жеткіземін деп 70 тен аса адамды алдап, 420 миллион теңгені жымқырған

Елорда тұрғыны Оңтүстік Кореядан тиімді бағамен көлік әкеліп беремін деп 70-тен аса адамды алдап, 420 миллион теңгені жымқырғаны үшін 6 жыл 8 айға бас бостандығынан айырылды, – деп хабарлайды Aikyn.kz.

Астана қалалық прокуратурасының мәліметінше, алаяқ жәбірленушілерді шетелдегі қатынастары туралы жалған ақпаратқа сендіре отырып, автокөлік сатып алуға ниет білдірген азаматтарға алдын ала толық төлем жасаған жағдайда оларға Оңтүстік Кореядан тиімді бағамен автокөлікке тапсырыс беруді ұсынған. 

Алайда жәбірленушілерге берілген көліктер бұрын автокөлікті жалға беру компанияларына сотталғанға уақытша пайдалануға берілгендігі анықталды.

Мәселен, алаяқ жәбірленушіден 4 көлікті жеткізу үшін 14,5 млн теңге алған, ал көліктерді ресми түрде тіркеу алдағы уақытқа болжанған.

Бұл ретте сотталған қылмыстық әрекеттерін жасыру мақсатында көліктерді жалға алу ақысын енгізіп жүрген.

Сотталған азаматтың алаяқтық әрекеттерінен 70-тен астам тұлға зардап шекті, жалпы шығын 420 млн теңгені құрады.

– Сотта прокурорлар қылмыскердің өзіне жүктелген міндеттерді орындауға нақты мүмкіндігі болмағанын, қылмыстық ниетін орындау мақсатында автокөліктерді жалға беру шартын жасасып, ұрланған ақшалай қаражатты өзінің жеке мақсаттарына пайдаланғанын дәлелдеді.

Сотталған азамат өз кінәсін толық мойындады.

Сот қылмыскерге 6 жыл 8 айға бас бостандығынан айыру жазасын тағайындады.

Жәбірленушілердің азаматтық талаптары қанағаттандырылды, – делінген ресми хабарламада. 

Елорда прокуратурасы белгілі бір қызметтерді көрсету құқығын растайтын құжаттары жоқ тұлғалармен мәмілелер жасаудан бас тартуға кеңес береді.