Ердоған Украина мәселесі бойынша саммит өткізу идеясына пікір білдірді

АСТАНА, 5 қаңтар – Sputnik. Украина мәселесі бойынша Ыстанбұлда саммит өткізу идеясы әлі күн тәртібінен түскен жоқ, Түркия бұл бастаманы белсенді түрде ілгерілетіп жатыр. Бұл туралы республика президенті Режеп Тайып Ердоған мәлімдеді, деп жазды Блумберг агенттігі.

Ердоған бұған дейін Ресей, АҚШ, Түркия және Украина лидерлерінің қатысуымен Ыстанбұлда Украинадағы қақтығысты реттеу бойынша саммит өткізуді ұсынған еді.

"Ыстанбұлда бейбіт саммит өткізу идеясы әлі күн тәртібінен түскен жоқ; керісінше, біз осы нұсқаны белсенді түрде ілгерілетуді жалғастырып жатырмыз. Шарттар дайын болған сәтте Түркия Ыстанбұлды қайтадан бейбіт келіссөз орталығына айналдыруға дайын; есіктеріміз барлық тарапқа айқара ашық. Мен бұл шешімді бірнеше мәрте Ресей президенті Владимир Путинге де, Украина басшысы Владимир Зеленскийге де анық жеткізгенмін", – деп атап өтті Ердоған.

Ресей мен Украина делегациялары арасындағы келіссөздердің үшінші кезеңі шілде айының соңында Ыстанбұлдағы Чираган сарайында өтті және шамамен бір сағатқа созылды.