Ермек Серкебаев туралы кітаптың толықтырылған нұсқасы жарық көрді

Алматыда Абай атындағы Қазақ ұлттық опера және балет театрында көрнекті қазақ әншісі, өнер қайраткері Ермек Серкебаевтың туғанына 100 жыл толуына орай «Ермек Серкебаев. И жизнь, и молодость, и счастье…» кітабының екінші, толықтырылған басылымының тұсаукесері өтті,  – деп хабарлайды Aikyn.kz. 

Салтанатты іс-шараға кітап авторы Ирина Серкебаева арнайы АҚШ-тан келіп қатысты. Кездесуге сондай-ақ Ермек Серкебаевтың жақындары мен өнердегі ізбасарлары Мұрат Серкебаев, Байғали Серкебаев және Жәмилә Серкебаева жиналды.

Кітаптың алғашқы басылымы 2009 жылы жарық көрген. Он жеті жылдан кейін Ирина Серкебаева әкесінің өмірі мен шығармашылық жолына қайта үңіліп, еңбегін жаңа деректермен, зерттеулермен және құнды материалдармен толықтырды.

Жаңа басылымда Ермек Серкебаевтың шығармашылық тұлғасының қалыптасуына ықпал еткен кеңестік өнер кеңістігі мен сол дәуірге арналған тараулар қамтылған. Сондай-ақ, кітапта камералық музыка мен қазақтың халық әндеріне қатысты зерттеулер, оның ұстаздары туралы өмірбаяндық деректер жан-жақты қарастырылады.

Басылымның мазмұны жаңа құжаттармен, сирек кездесетін фотосуреттермен және Ермек Серкебаевтың өмірінің әр кезеңін тереңірек танытуға мүмкіндік беретін тарихи материалдармен толыққан.

Кітапта әншінің балалық шағы, отбасы, білімі, театрдағы қызметі, музыка әлеміндегі шығармашылық жолы, сондай-ақ әріптестері мен достары туралы естеліктер қамтылған.

Бұл кітап қазақ өнерінің көрнекті өкілдерінің бірі Ермек Серкебаевтың өмірі мен шығармашылығы туралы баяндау ғана емес, сонымен қатар тұтас бір мәдени дәуірдің, өнер адамдарының тағдырының және әке мен қыз арасындағы рухани сабақтастықтың құнды куәсі.