Есік қаласында есірткісіз өмірді насихаттайтын спорттық іс шара өтті

Алматы облысының Есік қаласында өткен «Чемпиондық Рух» жобасы жастар арасында салауатты әрі есірткісіз өмір салтын насихаттаудың жарқын үлгісіне айналды, – деп хабарлайды Aikyn.kz сайты.

Іс-шара барысында жүздеген жас спортқа деген қызығушылығын арттырып, өз денсаулығына жауапкершілікпен қараудың маңызын түсінді.

Басты мақсат – жастардың бойында отансүйгіштік пен ерік-жігерді қалыптастыру, сондай-ақ салауатты өмір салты арқылы есірткіге қарсы иммунитетті күшейту болды.

Іс-шараға Алматы облысы полиция департаменті бастығының орынбасары, полиция полковнигі Ақылбек Төлеуов қатысып, жастарды өз өмірінде дұрыс таңдау жасауға және спортты өмірлік қағида етуге шақырды.

Алматы облыстық мәслихат депутаты, «Чемпиондық Рух» жобасының амбассадоры Нұрсұлтан Орынбасаров қатысушылармен бірге жаттығу өткізіп, өз сөзінде жобаның ел болашағы үшін маңызын атап өтті:

«Чемпиондық рух – бұл жай ғана жоба емес, бұл ұлттық деңгейге көтерілуге тиіс бастама. Егер жастар мен ересектер күн сайын таңғы жаттығуды өмір салтына айналдырса, онда дені сау ұлт, мықты қоғам және берік мемлекет қалыптасады», - деді ол.

Оның айтуынша, «Чемпиондық Рух» – денсаулық пен табандылық құндылықтарын дәріптейтін қозғалыс, ал оның әр өңірге таралуы ұлттық дәстүрге айналуы тиіс.

Іс-шараға сондай-ақ қоғам мен спорт саласының белгілі өкілдері қатысты: Сергей Горяной – Алматы облыстық мәслихат депутаты, Айсара Керімбекова – самбо және дзюдо күрестерінен халықаралық дәрежедегі спорт шебері, Алпыс Ермағанбетов – жеңіл атлетикадан екі дүркін әлем чемпионы, КСРО спорт шебері, Алексей Слесаренко – бодибилдингтен Азия және Қазақстан чемпионы, танымал блогер, Любовь Темникова – джиу-джитсу және грэпплингтен әлем чемпионы, Дуглас Хейбейро – кәсіпқой аралас жекпе-жек шебері, Дархан Ахметов – Еңбекшіқазақ ауданының мәдениет, тілдерді дамыту, дене шынықтыру және спорт бөлімінің бастығы, Абай Сырғабаев – Еңбекшіқазақ ауданының балалар және жасөспірімдер спорт мектебінің директоры, Алейхан Мамыров қоғам белсендісі.

Бұл бастама «AMANAT» партиясы жанындағы «Жастар Рухы» жастар қанатының қолдауымен жүзеге асырылып отыр. Жоба жастардың өз әлеуетін спорт арқылы ашуына, салауатты өмір салтына бет бұруына нақты серпін беруде.

Алдағы уақытта «Жастар Рухы» барлық өңірлерде «Чемпиондық рух» жобасын тұрақты форматқа айналдырып, спорттық белсенділік пен қоғамдық жауапкершілікті арттыру бағытында жүйелі жұмыстарды жалғастырады.