Есік қаласында түлектер интернеттің өшуіне байланысты ҰБТ ны қайта тапсырады

Фото: Depositphotos.сom

Оқиға туралы талапкерлердің бірінің анасы әлеуметтік желіде жазды. Оның айтуынша, ұлы 28 мамыр күні таңғы сағат 09:00-де тест тапсырған. Алайда емтихан аяқталуға небәрі 20 минут қалғанда тестілеу орталығында кенеттен интернет өшіп қалған.

«Ұлым таңғы 9-дан бері ҰБТ тапсырып отырды. Аяқталуына 20 минут қана қалған еді. Сол кезде тестілеу орталығында интернет өшіп қалды. Тестті аяқтап үлгермегендердің нәтижелері сақталмай қалды. Енді балалар осы күйзелісті қайта бастан өткеруге мәжбүр, себебі емтихан жексенбіге ауыстырылды», деп жазды ол.

Бұл жағдай әлеуметтік желілерде қызу талқыға түсті. Қолданушылар тестілеуді ұйымдастыру сапасын сынға алып, мұндай маңызды емтихан кезінде техникалық ақаудың қалай орын алғанына наразылық білдірді.

Павлодарлық оқушы ҰБТ-дан 140 балл жинады

Ұлттық тестілеу орталығының мәліметінше, 20 мамыр күні Қазақстанның бірнеше өңірінде және 28 мамырда Алматы облысының Есік қаласында интернет қызметін ұсынатын мердігер ұйымдар тарапынан техникалық ақаулар болған.

Ұлттық тестілеу орталығы талапкерлер мен ата-аналардың алаңдаушылығын түсінетінін мәлімдеді.

«20 мамырда интернет қалпына келгеннен кейін тестілеу 30 минуттан соң жалғасты. Ал 28 мамырда Есік қаласында тестті аяқтап үлгермеген талапкерлер үшін ҰБТ 31 мамырға, бірінші лекке ауыстырылды», делінген хабарламада.

Еске сала кетейік, бұған дейін Ғылым және жоғары білім министрі Саясат Нұрбек жарық өшіп қалған жағдайда бағалау жүйесі қалай жүргізілетінін айтқан болатын.