​Еуропадағы байырғы монарх 89 жасында дүниеден өтті

Норвегия королі Харальд V 28 тамызда 89 жасында дүние салды. Монарх денсаулығы нашарлап, ұзақ уақытқа созылған науқастан кейін Ослодағы университет ауруханасында көз жұмды.

«Аса зор қайғымен Мәртебелі король Харальдтың дүниеден өткенін хабарлаймыз. Король жұма, 28 тамыз күні сағат 06:35-те тыныш о дүниеге аттанды», — делінген Норвегия Корольдік үйінің ресми хабарламасында.

Харальд V 17 тамызда ауруханаға түскен еді. Ол гемолитикалық анемиядан емделіп жатқан, кейіннен оның қанынан бактериялық инфекция анықталды. Қаза боларының алдында сарай монархтың жағдайы өте ауырлап кеткенін хабарлаған болатын. Өлімнің ресми себебі әлі жарияланған жоқ.

Харальд V таққа 1991 жылғы 17 қаңтарда өзінің әкесі, король Улаф V қайтыс болғаннан кейін отырды. Ол 35 жылдан астам уақыт ел басқарып, Еуропадағы ең кексе биліктегі монарх болып саналды.

Associated Press агенттігінің хабарлауынша, ол қайтыс болғаннан кейін тақ оның 53 жастағы ұлы Хоконға өтіп, ол король Хокон VIII болды.

Харальд 1937 жылы дүниеге келген және соңғы алты ғасырға жуық уақытта өз елінде туған алғашқы норвегиялық ханзада болды. Екінші дүниежүзілік соғыс кезінде ол анасымен және әпкелерімен бірге АҚШ-та қуғында болған.

Сондай-ақ монарх кәсіби яхтсмен болды және үш Олимпиада ойындарында Норвегия намысын қорғады. Ол қоғамдық бірлік, тең құқылылық пен төзімділікті жақтаушы ретінде ел есінде қалды.

Кеше, 17:11