Еуропаға сапарлар қымбаттауы мүмкін ЕО туристер үшін жаңа ережелер дайындап жатыр

Болашақта Шенген аймағы елдеріне сапар шегу қымбаттауы мүмкін. Еурокомиссия шенген визасының қазіргі төлеміне қосымша алым енгізу мүмкіндігін қарастырып жатыр, - деп хабарлайды Tengri Travel.

Әзірге бұл – ЕО Виза кодексінің жаңа редакциясын дайындау аясында қаралып жатқан нұсқалардың бірі ғана.

Комиссия ықтимал төлемнің нақты мөлшерін атаған жоқ. Оны енгізу туралы түпкілікті шешім де әлі қабылданған жоқ. Алдын ала мәлімет бойынша, виза ережелерін жаңарту туралы ұсынысты 2027 жылдың бірінші тоқсанында ұсыну жоспарланған.

ЕО виза ережелерін не үшін қайта қарап жатыр?

Еурокомиссия Виза кодексінің жаңа редакциясын дайындауға 2026 жылғы қаңтарда қабылданған виза саясаты саласындағы алғашқы жалпыеуропалық стратегиядан кейін кірісті. Онда ЕО-ға мүше емес елдердің азаматтары үшін қолданылатын және кез келген 180 күндік кезең ішінде Шенген аймағында 90 күнге дейін болуға мүмкіндік беретін қысқа мерзімді визалар ережесін жаңарту көзделген.

Комиссия жүйені бірыңғай етіп қана қоймай, оны қауіпсіздік, миграция және үшінші елдермен қарым-қатынас мәселелерінде қолдануды күшейтпекші. Сонымен қатар туристер, бизнес өкілдері және саяхатшылардың басқа да санаттары үшін сапарларды жеңілдету мақсаты да сақталып отыр.

Еурокомиссия деректеріне сүйенсек, 2024 жылы ЕО елдері мен Шенгенге қатысты мемлекеттердің консулдықтарына қысқа мерзімді виза алуға 11,7 миллионнан аса өтініш түскен. Оның 10,3 миллионға жуығы берілген.

Еурокомиссия құжатта ЕО елдерімен бірлесіп, "шенген визасы үшін төленетін ақыдан бөлек, ЕО деңгейінде алынатын үйлестірілген қосымша алым" енгізу мүмкіндігін зерттеуді ұсынады.

Түскен қаражат ЕО-ның ортақ виза саясатын одан әрі дамытуға жұмсалуы мүмкін деп болжанған.

Дегенмен жарияланған құжатта мұндай алымның мөлшері, оны енгізу мерзімдері немесе ол қолданылатын өтініш берушілер санаттары туралы ақпарат жоқ.

Комиссия бұл бастаманың әзірге дайындық сатысында екенін ерекше атап өтті. Құжат "бұл бастаманың іске асатыны немесе оның соңғы мазмұны қандай болатыны туралы Комиссияның түпкілікті шешімін алдын ала айқындамайды".

Тағы не өзгеруі мүмкін?

Болашақ реформаның негізгі бөліктерінің бірі ЕО-ның одаққа мүше емес мемлекеттермен қарым-қатынасына қатысты.

Қазіргі Виза кодексі виза саясатын үшінші елдердің мигранттарды қайтару және реадмиссия саласындағы ынтымақтастығымен байланыстыруға мүмкіндік береді. Еурокомиссия мұндай ынтымақтастық күрт нашарлаған жағдайда қазіргі механизм жеткілікті деңгейде икемді емес деп санайды.

Реформа аясында шектеулі визалық шараларды таңдау мүмкіндігін кеңейту және мұндай жағдайларға жылдамырақ әрекет ету мәселесін зерттеу ұсынылады. Бұл ретте Комиссия шешімдер нақты жағдайларға сәйкес келуі тиіс екенін көрсетіп отыр.

Шекараны басқару, қауіпсіздік, заңсыз көші-қонмен және мигранттарды контрабандалаумен күрес саласындағы ынтымақтастық жеткіліксіз болған жағдайлар үшін жеке механизм қарастырылмақ.

Шектеулер саяхатшылардың қай санаттарына әсер етуі мүмкін?

Еурокомиссия үшінші елдегі саяси немесе қауіпсіздік жағдайы айтарлықтай нашарлаған жағдайда, атаулы визалық шектеулерге арналған жалпыеуропалық механизм құру мүмкіндігін де қарастырып жатыр.

Құжатта гибридті қатерлер, ақпараттық манипуляциялар мен араласу, көші-қонды қысым құралы ретінде пайдалану, саботаж, тыңшылық және ашық агрессия сияқты мән-жайлар атап өтілген.

Мұндай шаралар "жедел, пропорционалды, нысаналы және қайтарымды" болуы тиіс деп болжанған. Сонымен қатар Комиссия құқық қорғаушылар, диссиденттер, тәуелсіз журналистер және азаматтық қоғам ұйымдарының өкілдері үшін, сондай-ақ гуманитарлық және басқа да ерекше жағдайлар үшін кепілдіктер қарастыруды ұсынады.

Кімдер үшін виза рәсімдеу жеңілдеуі мүмкін?

Кейбір механизмдердің қатаңдатылуымен қатар, Еурокомиссия сенімді өтініш берушілер мен іскер саяхатшылар үшін сапарларды жеңілдетпекші.

Қазіргі уақытта ЕО-ның кейбір мемлекеттері белгілі бір компания қызметкерлері немесе жекелеген сала өкілдері үшін виза рәсімдеудің өздерінің жеңілдетілген схемаларын қолданады. Алайда мұндай ережелер бүкіл Шенген аймағына автоматты түрде таралмайды.

Комиссия жекелеген елдерде немесе юрисдикцияларда тексерілген компаниялардың ортақ тізімін жасау мүмкіндігін зерттеуді ұсынады. Мұндай ұйымдардың қызметкерлері өтініштерін жеделдетіп қаратуға, басымдықпен жазылуға немесе аз мөлшерде растаушы құжаттар ұсынуға мүмкіндік алуы ықтимал.

Еурокомиссияның жоспары бойынша, бұл бірден бірнеше ЕО елінде жұмыс істейтін компаниялар үшін визалық процедураларды болжамды ете түсуі тиіс.

Өзгерістер визалық талаптардан тыс қалған жекелеген ерекшеліктерге де қатысты болуы мүмкін. Мысалы, ЕО-ның кейбір мемлекеттері дипломатиялық немесе қызметтік паспорт иелері үшін визадан екіжақты босату тәртібін сақтап отыр.

Еурокомиссия мұндай ерекшеліктер белгілі бір жағдайларда жалпыеуропалық шектеу шараларына қайшы келуі мүмкін екенін алға тартады. Сондықтан осындай шаралардың біркелкі қолданылуын қамтамасыз ету үшін Визалық регламенттің тиісті ережелерін бір мезгілде өзгерту жоспарланған.

Сонымен қатар, жаңа редакция қолданыстағы ережелердегі техникалық сәйкессіздіктерді, соның ішінде визалық рәсімдерді цифрландыруға қатысты олқылықтарды жоюы тиіс.

Жаңа ережелер қашан ұсынылуы мүмкін

Ұсынысты дайындаудың алдын ала мерзімі - 2027 жылдың бірінші тоқсаны. Дегенмен Еурокомиссия бұл мерзімдердің өзгеруі мүмкін екенін ескертеді.

Қазіргі уақытта комиссия ЕО азаматтарынан, Еуроодаққа мүше емес елдерден, мемлекеттік органдардан, бизнес өкілдерінен, саяхатшылардан және қоғамдық ұйымдардан ұсыныстар жинап жатыр. Олар өз ескертулерін Have Your Say порталы арқылы ЕО-ның 24 ресми тілінің кез келгенінде жолдай алады.

Консультациялар аяқталғаннан кейін Еурокомиссия келіп түскен ұсыныстардың жиынтығын дайындауды жоспарлап отыр.

Тағы оқыңыз: Қазақстандықтарға Шенген визасын алу жеңілдетіледі: СІМ мән-жайын айтты

Бізді Google-дың негізгі дереккөздер тізіміне қосыңыз

Қосу