Еуропалық одақ Қазақстанға 500 млн еуро инвестиция құяды

Қазақстан мен Еуропалық одақ өнеркәсіп, металлургия және ауыл шаруашылығы машина жасау салаларындағы ынтымақтастықты кеңейтуге бағытталған бірқатар маңызды келісімдерге қол қойды.

Құжаттарға Мемлекет басшысы Қасым-Жомарт Тоқаевтың Бельгияға ресми сапары аясында қол қойылды. Келіссөздерге Қазақстан Республикасының Өнеркәсіп және құрылыс министрі Ерсайын Нағаспаев қатысып, еуропалық компаниялар мен қаржы институттарының өкілдерімен кездесулер өткізді.

Брюссельде өткен жоғары деңгейдегі іс-шараларға Президент Қасым-Жомарт Тоқаевпен қатар Еуропалық кеңес Президенті Антониу Кошта мен Еуропалық комиссия Президенті Урсула фон дер Ляйен қатысты.

Сапар аясындағы негізгі құжаттардың бірі – Қазақстан Республикасы Өнеркәсіп және құрылыс министрлігі мен Еуропалық қайта құру және даму банкі арасындағы меморандум болды. Құжат минералдар мен металдар саласындағы озық тәжірибе орталығын құруға арналған техникалық-экономикалық негіздемені әзірлеуді көздейді.

Жоба аясында елімізде заманауи геологиялық кластер қалыптастырып, ғылыми зерттеулер мен инновациялық технологияларды дамыту жоспарланып отыр.

Сонымен қатар ауыл шаруашылығы техникасын өндіру саласында еуропалық Dewulf NV және Väderstad Group компанияларымен өндірісті жергіліктендіру жөнінде келісімдер жасалды. Жобалардың жалпы инвестициялық құны 500 миллион еуроны құрайды.

Өндіріс орындары Қостанай мен Түркістан қалаларындағы «АгромашХолдинг KZ» кәсіпорындарының базасында орналастырылады. Бұл бастама отандық машина жасау саласының дамуына серпін беріп, жаңа жұмыс орындарын ашуға мүмкіндік береді.

Бұдан бөлек, «Жезқазғансирекмет» республикалық мемлекеттік кәсіпорны арқылы Еуропаның EIT RawMaterials қауымдастығымен кадр даярлау бағытында келісімге қол қойылды. Сондай-ақ швейцариялық P&P Industries AG компаниясымен күкірт қышқылы зауытының техникалық-экономикалық негіздемесін әзірлеу жөніндегі ынтымақтастық туралы құжат рәсімделді.

Келіссөздер барысында Alphamar Resources, Danieli Group және BAUER Röhren- und Pumpenwerk секілді халықаралық компаниялармен стратегиялық әріптестікті кеңейту мәселелері де талқыланды.

Тараптар стратегиялық маңызды минералдарды игеру, металлургия, машина жасау және өнеркәсіптік технологиялар салаларында өзара тиімді ынтымақтастықты одан әрі дамытуға уағдаласты.

Сарапшылардың пікірінше, жаңа инвестициялық жобалар Қазақстанның өнеркәсіптік әлеуетін арттырып, өндірісті әртараптандыруға және жоғары қосылған құны бар өнім шығару көлемін ұлғайтуға мүмкіндік береді.