Еуропаның тағы бір ірі өзені рекордтық деңгейде тартылды

Италияның солтүстігіндегі По өзенінің деңгейі жазғы төртінші аптап салдарынан рекордтық төменгі көрсеткішке дейін түсті. Бұл Павия маңындағы өзен арнасының құрғап қалуына әкеп соғып, су тапшылығы мен егін тағдырына қатысты қауіпті күшейтті, деп хабарлайды Tengrinews.kz тілшісі Euronews-ке сілтеме жасап.

Тичино өзені құятын тұста қайықтар құм, балдыр және ашылып қалған қиыршық тас қайраңдарымен қоршалған таяз, лай суда тұр. По өзені бассейнінің әкімшілігі су шығыны маусымдық орташа көрсеткіштерден айтарлықтай төмен екенін, ал бірнеше гидробекеттегі деңгей 2022 жылғы қатты құрғақшылық кезінде тіркелген рекордтық деңгейге жақындап қалғанын немесе одан асып түскенін хабарлады.

По өзені Италияның солтүстігіндегі ауыл шаруашылығы секторы үшін, соның ішінде жеміс-жидек, көкөніс пен күріш егістіктері суға тәуелді Парма төңірегіндегі "Азық-түлік алқабы" (Food Valley) үшін өте маңызды. Өзен деңгейінің шектен тыс төмендеуі сумен қамтамасыз етуге де әсер етіп жатыр: Ansa агенттігі Пьемонт пен Ломбардияның 100-ден астам коммунасына судың автоцистерналармен жеткізіліп жатқанын хабарлады.

Павия ауданында өзен арнасы таяз тарамға дейін тарылып, түбінің үлкен бөлігі ашылып қалған, бұл серуендеу кемелерінің қозғалысын және есу клубтарының жұмысын қиындатып отыр. Күріш өсіретін Ломеллина аймағының билігі жауын-шашын болмаса, жағдай нашарлауы мүмкін екенін және фермерлерге жерасты сулары мен төтенше шараларға көбірек сенуге тура келетінін ескертті.

Төменірек ағыста, Парма маңында жеміс пен көкөністің қарқынды өсірілуін қамтамасыз ететін салалар мен суару каналдары тартылып жатыр. Фермерлер суды үнемдеу режимі енгізіліп, суару кестесіне әсер етіп жатқанын айтады, ал бассейн әкімшілігі Пьяченцадан төменгі учаскені ерекше осал деп атап отыр: су деңгейінің төмендеуінен ағаш діңдері мен басқа да үйінділер көрініп қалған.

Туринде По өзені балдыр басып, баяу ағатын каналға айналды. Муниципалдық қызметтер қала орталығына жақын жердегі су өсімдіктерінің қалың тоғайын тазарту үшін баржалардағы экскаваторларды қолданып жатыр. Аймақтық мәліметтер Турин арқылы өтетін су шығыны маусым айынан бері екі еседен астам азайғанын, ал Сант-Антонио аралы маңындағы төменгі өлшеу станциясында ағын көлемі кейде үйреншікті деңгейдің төрттен біріне дейін төмендегенін көрсетеді.

Билік өкілдері аптап пен судың азаюы балдырлардың өсуін тездетіп, кеме қатынасы мен судағы демалыс түрлеріне кедергі келтіріп жатқанын ескертеді. Ұзаққа созылған ыстық бүкіл Еуропада құрғақшылық пен орман өрттерін ушықтырып, су ресурстарына түсетін салмақты арттырды.

Бұған дейін Батыс Еуропада бақылау тарихындағы ең ыстық маусым мен шілде айлары тіркелгені хабарланған. Аномальді ыстық салдарынан Дунай өзенінің (Еуроодақтағы ең ұзын өзен) су деңгейі тарихи минимумға дейін төмендеп, нәтижесінде 1944 жылы суға батқан ондаған нацистік кеме ашылып қалған.

Google News арқылы жаңалықтарымызды қадағалаңыз