FlyArystan Тұран футбол клубын сатып алуды жоспарлап отырған жоқ компания өкілі

Бұған дейін FlyArystan компаниясы жекешелендіруге қатысуы мүмкін әлеуетті үміткерлердің қатарында аталған болатын. 

Алайда қазір Түркістан облыстық дене шынықтыру және спорт басқармасы өкілдері әуе компаниясымен ресми келіссөздер жүргізілмегенін атап өтті.

— Бүгінгі таңда «Тұран» футбол клубын жекешелендіру мәселесіне қатысты нақты инвестор анықталған жоқ. FlyArystan әуе компаниясымен ресми келіссөздер жүргізілген жоқ. Шешім қабылданған жағдайда қосымша ақпарат беріледі, — деп хабарлады ведомство.

Аталған басқарманың баспасөз қызметіне жауапты қызметкері Асқат Мырзахметов Kazinform агенттігіне берген түсініктемесінде бұған дейін жарияланған мәліметті футбол клубының ұжымы ішінде айтылған бейресми пікірге сүйеніп таратқанын жеткізді.

Клуб өкілдерінің мәліметінше, сатып алуға қатысты болжамдар әуе компаниясымен бұрынғы ынтымақтастық аясында туындаған.

— Бұған дейін FlyArystan клубқа демеушілік қолдау көрсеткен болатын. Ұжым ішінде ықтимал сатып алу жөнінде бейресми болжамдар айтылған. Бұл нұсқалар ізгі ниеттен туындап, журналистердің сауалдарына жауап беру барысында жария етілді, — деді клубтың медиа-офицері Нұрдәулет Оразбек.

Әуе компаниясы да бұл мәселеге қатысты ресми ұстанымын білдірді.

FlyArystan баспасөз қызметінің мәліметінше, компания «Тұран» футбол клубын немесе өзге де спорт ұйымдарын сатып алу не басқару бойынша келіссөздерді жүргізіп жатқан жоқ және мұндай жоспар құрмаған.

— Компания клубты сатып алуға үміткер деген ақпарат шындыққа сәйкес келмейді, — деп атап өтті әуе компаниясы.

Таяуда Түркістан облысының намысын қорғайтын «Тұран» футбол клубы электронды сауда-саттыққа шығарылды. Бастапқы бағасы — 1 054 000 теңге, кепілдік жарна — 158 мың теңге. Электрондық сауда-саттық 3 наурызға белгіленген.