Футбол матчынан кейінгі видео қазақстандыққа 86 500 теңгеге түсті

Ақтөбе облысында TikTok пен Instagram-да видео жариялаған 27 жастағы ер адам әкімшілік жауапкершілікке тартылды. Полиция бұл ролик қоғамдық әдеп және мінез-құлық нормаларын бұзғанын мәлімдеді, деп хабарлайды Tengri Life.

Ведомство мәліметінше, жазба 8 шілдеде жарияланды, ал айыппұл көлемі 20 АЕК - 86 500 теңге болды.

Полиция ақпаратына сәйкес, қызметкерлер TikTok пен Instagram-да олардың бағалауы бойынша "қоғамдық әдеп және мінез-құлық нормаларын өрескел бұзатын" бейнероликті анықтаған.

Тексеру барысында жазба авторы Ақтөбе облысының 27 жастағы тұрғыны Қолдас Қойшығараев екені анықталды. Полиция ол әкімшілік жауапкершілікке тартылып, 20 АЕК немесе 86 500 теңге көлемінде айыппұл салынғанын хабарлады.

Бұл ретте ер адамның роликтегі қай сөзі немесе әрекеті жауапқа тартуға негіз болғаны нақтыланбаған.

Ведомство әлеуметтік желілердегі жарияланымдар құқықтық алаңнан тыс емес екенін атап өтті.

"Әлеуметтік желілер - жалпыға қолжетімді қоғамдық кеңістік. Сондықтан пайдаланушылардың әлеуметтік желілердегі әрекеттеріне Қазақстан Республикасының қолданыстағы заңнамасының талаптары толықтай қолданылады», - деп мәлімдеді полиция.

Бұған дейін ІІМ бүкіл ел бойынша 20-дан астам стример жауапкершілікке тартылғанын хабарлаған болатын.

Ведомство мәліметінше, тікелей эфир кезінде кейбір авторлар балағат сөздер айтып, әдепсіз мінез-құлық көрсеткен, қауіпті пранктер ұйымдастырып, өзге адамдарды қорлаған.

"Қаралым, лүпіл және донат қуған олар балағат сөздер айтып, әдепсіз мінез-құлық көрсеткен, қауіпті пранктер ұйымдастырып, өзге адамдардың намысына тиген. Мұндай контенттің күн сайын қалың аудиторияға, соның ішінде кәмелетке толмағандарға қолжетімді болуы ерекше алаңдаушылық тудырады", - деп түсіндірді ІІМ өкілдері.

Осы жұмыс аясында Қазақстанның түрлі өңірінде тікелей эфир авторлары әкімшілік жауапкершілікке тартылды.

Шымкентте 48 жастағы Ербол Дүйсенбаев TikTok-тағы тікелей эфир кезінде балағат сөздер қолданған. Сот оны 10 тәулікке әкімшілік қамауға алу туралы шешім шығарды.

Талдықорғанда 44 жастағы Гүлмира Қасенова TikTok эфирінде балағат сөздер айтып, қоғамдық тәртіпті бұзған. Ол бұған дейін де осындай заңбұзушылық үшін жауапқа тартылған болатын. Бұл жолы сот оған әкімшілік айыппұл салды.

Павлодарда 26 жастағы Аслан Амантаев тікелей трансляция кезінде көлік тізгіндеп отырып, қауіпсіздік белдігін тақпаған және балағат сөздер айтқан. Сот оны 20 тәулікке қамауға алды.

Тағы бір оқиға Түркістанда болды. Әлеуметтік желілерде bayan_kyz, fatima.sh0000 және fatima_s003 никнеймдерімен танымал Баян Шанкеева жауапкершілікке тартылды. ІІМ мәліметінше, ол тікелей эфирлер кезінде балағат сөздер қолданып, агрессивті мінез-құлық көрсеткен. Оған әкімшілік айыппұл салынды.

ІІМ бұған дейін профилактикалық мақсатта треш-стримерлердің есімдерін жариялайтынын мәлімдеген. Ведомство әлеуметтік желілердегі анонимділік пайдаланушыларды жауапкершіліктен босатпайтынын ескертті.

Тағы оқыңыз: “Есімдерін жариялаймыз“: Қазақстанда интернет треш-стримерлерден “тазартылып“ жатыр

Google News арқылы жаңалықтарымызды қадағалаңыз