Газа үкіметі: Секторда 20 мың жарылмаған оқ дәрі қалды

Газа үкіметінің баспасөз қызметі таратқан мәлімдемеде, Израильдің шабуылдарынан кейін Газа секторында 70 миллион тонна қирандылар қалғаны айтылған.

Мәлімдемеде Израильдің әскери әрекеттерінен кейін аймақ құрылыс пен экология тұрғысынан апат аймағына айналғаны, сондай-ақ жарылмаған 20 мың оқ-дәрінің тұрғындар өміріне қауіп төндіріп тұрғаны атап өтілді. Бұл оқ-дәрілерді залалсыздандыру үшін арнайы мамандардан құралған топтар қажет екені айтылған.

Екі жылдан астам уақытқа созылған шабуылдардың салдарынан Газа секторы бұрын-соңды болмаған күйреуге ұшырады.

— 15 қазан, сәрсенбіге дейін алынған мәліметтерге сәйкес, қирандылар көлемі 65–70 миллион тоннаға жеткен. Бұл — Израиль тікелей қиратқан мыңдаған үй, нысан мен инфрақұрылымның қалдықтары, — делінген хабарламада.

Баспасөз қызметінің мәлімдеуінше, қирандыларды тазалау жұмыстары үлкен қиындықтарға тап болып жатыр. Израиль тарапынан жасалған кедергілерге байланысты ауыр техника мен қажетті құрал-жабдықтар аймаққа жеткізілмей отыр.

Тель-Авив үкіметі шекаралық өткізу бекеттерін жауып, үйінді астында қалған мүрделерді алып шығуға қажет құрылғыларды кіргізуге рұқсат бермейтін көрінеді.

Еске салсақ, 9 қазанда АҚШ президенті Дональд Трамп Мысырда жүргізілген келіссөздер аясында Израиль мен ХАМАС Газадағы бітім жоспарының алғашқы кезеңін мақұлдағанын хабарлады.

Келісім Мысырда жүргізілген келіссөздер нәтижесінде қол қойылып, 10 қазан күні Израиль үкіметінің мақұлдауымен күшіне енді.

Келісімге сәйкес, Израиль әскері «сары сызықтан» шегінгеннен кейін, сол күні сағат 12:00–де Газада бітім қолданысқа енгізілді.

Израильдің екі жылға созылған шабуылдарының салдарынан Газа секторында 67 967 палестиндік қаза тауып, 170 179 адам жарақат алған.

Бұдан бұрын Израиль қорғаныс министрі Газада атыстың қайта жалғасуы мүмкін екенін мәлімдеді.