Геннадий Головкин Халықаралық бокс федерациясын басқарады

Геннадий Головкин «World Boxing» халықаралық бокс федерациясы­ның президенті болып сайланды. Италияның Рим қаласында өткен конгресте әлемдік ұйымның тізгінін ұстаған отандасымыз – халықаралық спорт федерациясын басқарған Қазақ елінің алғашқы азаматы. Бұған дейін отандас­тарымыз спорт өрісінде мұндай бедел­ді ұйым, федерациялардың бас­шы­лық лауазымын атқарған емес.

Геннадий Головкин Халық­аралық бокс федерациясының пре­зиденті болып сайланса, тек қазақ боксы ғана емес, әлемде осы спорт түрінің өркен жаюына зор еңбек сіңіретінін газетіміздің өткен нөмірінде жазған едік.

Рим қаласында өткен Кон­гресте отан­дасымыз халық­аралық федерацияның президенті лауазымына үш жыл мер­зімге сайланды.

«Мен бокстың барлық өтке­лінен өттім, әуесқойлар арасында Олимпиада додасына қатысып, күміс медаль иелендім, әлем чемпионы атандым. Ал бүгінде спорт саласында жауапкершілік арқалап, басшылық қызмет атқарып келемін. Бала күнімнен жүрегіммен қалаған, көңілім ерекше құлаған спорттың болашағы үшін Халықаралық бокс федерациясына үлесімді қосып еңбек етуге келдім. Бұған дейін Халықаралық Олимпиадалық комитеті (ХОК) Olympism365 комиссиясының мүшесі ретінде, сонымен қатар «World Boxing» ұйымының Олимпиадалық комис­сиясының төрағасы лауазымын атқарғанда аңғарғаным, әділ басшылық ету – боксты, бокс­шыларды қорғайтын қалқан. Біз бүгін тарихи маңызды жиынға жиналдық. Халықаралық бокс федерациясы боксшылардың сені­мін күшейтетін, Олимпиадалық қауымдастық санасып, құрмет­тейтін ұйымға айналуы қажет»,  деді Г.Головкин.

Халықаралық ұйым­ның екі тізгін, бір шылбырын қолына алған жер­лесіміз боксты дамытуда әді­лет­тілік орнатып, бұра тартушы­лық­қа жол бермеу­ге күш салаты­ны­на тоқталды. ХОК-тің барлық құн­дылығына құрмет­пен қарап, әділдік орна­туға барын салатынын, зор жауап­­кершілік жүктеп, се­нім арт­­қан көпшілікке алғысын айтты.

Халықаралық бокс федера­циясының конгресінде ұйымның өзге де басқару органдарының жауапты тұлғалары сайланды. Федерацияның регламентінде қатталған түйткілді мәселелер, күнтізбедегі халықаралық ауқым­­ды шаралар, ұйымды да­мы­ту­дың өзекті тақырыптары талқы­ланды. Жарғыға сай қабыл­дан­ған шешімдер делегат­тардың дауыс беруі арқылы бекітілді. Кон­грес­те дауыс беруге 58 елдің бокс федерацияларының өкілдері қатысты.

2023 жылы сәуірде құрылған «World Boxing» ұйымының көздегені – боксты жазғы Олим­пия ойындарының бағдар­ламасындағы орнын сақтап, бола­шағын бекемдеу. Әйтпесе ХОК 2022 жылы бекіткен Олимпадалық спорт түрлерінің тізіміне бокс­ты қоспай қойды. Кілтипан халықаралық бокс қауымдастығы (IBA) тарапынан туындады. 2019 жылдың жазында Халықара­лық бокс қауымдастығының ішін­де тұтанып, жемқорлық мәселесі ушыққанда, ХОК бұл қауымдастықпен жұмыс істеуді тоқтатты. 2023 жылы маусымда Халықаралық олимпиада коми­теті бұл ұйымды мойын­даудан түп­кілікті бас тартып, іргесін аулақ салды. Мұның салқыны алдымен боксқа тиіп, 2028 жылы АҚШ-тың Лос-Андже­лес қаласында өтетін  Олимпия ойындарынан тыс қалуы да мүмкін еді. Былтырғы Париж Олимпиадасында бокс додасын ХОК арнайы жұмыс тобын құрып, солардың басқаруына беріп өткізді.

Бокс спорты Олим­пиада бағ­дарламасымен бірге жасай беруі үшін ХОК жаңа ұйым құру қажеттігін ескертті. Көп өтпей 2023 жылдың көктемінде «World Boxing» ұйымы құрылып, жер-жаһанға сауын айтылды. Алайда халықаралық бокс федерациясы жұмысына сол жылдың күзінде кірісті. Германияның Франкфурт қаласында алғашқы конгресін өткізіп, президенті, комитет басшылары сайланды. Келешекте атқарылар жұ­мысы жазылып, жарғысы бекітілді. Тұңғыш президенті бо­лып сайланған нидерландық Бо­рис ван дер Ворспен қанаттаса Райан О’Ши (Канада), Мэтт Холт (Англия), Дина Гликидис (Аустралия) вице-президент болып еңбек етті. Штаб-пәтері Швейцарияның Лозанна қаласындағы ұйымның беделін арттыру жаңа командаға сын. Бүгінде ұйымға 136 елдің бокс федерациясы мүше.

Отандасымыз әлемдік ұйым­­ның президенті болып сай­ланғанын жаһандық ақпарат құралдары да сүйіншілей жарыса жазып жатыр. ВВС, Reuters агент­тіктері Головкин халықаралық бокс ұйымының президенті болып сайланғанын, жаңа президенттің жанкүйерлердің бокс спортына деген іңкәрлігін күшейтіп, сенімін арттыруға күш саламын деген пікірін жариялады.

«World Boxing» ұйымының биылғы конгресіне төрағалық еткен халықаралық бокс феде­рациясының вице-президенті Дина Гликидис болашақта атқа­рылар жұмысқа қатысты келелі мәселелер айтылғанын атап өтті. «Конгресс – «World Boxing» ұйымының ең жоғары билік органы саналады. Осындай алқалы басқосуда боксты өріс­тетудің түйткілді мәселелері талқыланып, шешімі айтылады. Құрылғанына екі жыл болған ұйым бірқатар табысқа жетті. Біз әрқашан ашықтық пен қатаң басқару қағидасына сүйеніп, өз міндетін лайықты атқаруға ұмтыламыз. Жаңа сайланған президент Г.Головкин атқарушы кеңеспен тізе қосып, 2028 жылы өтетін Олимпиада додасына әзірлікті күшейте түсетінімізге сенімдімін», деді Д.Гликидис.

Бокстан ұлттық құраманың бас бапкері қызметін атқарған білікті маман Тұрсынғали Еділов Геннадий Головкиннің халықаралық ұйымға жетекшілік етуі қазақ спортының беделі жоғары екенін айқындай түседі дейді.

«Бәріміз үшін де бұл ақжол­тай жаңалық болды. Қазақ боксының жаңа дәуірі туады деп сенемін. Генаны 2000 жылдары жастар сапына өткен шағынан жақсы білемін, өте ізденімпаз, еңбекқор азамат. Әуесқойлар арасында, кейін кәсіпқой боксқа ауысқанда да еліміздің абыройын асқақтатты. Ал бүгінде әлемдік тұлғаға айналып, дүниежүзінің боксына бас ие болып сайланды. Енді біздің боксшыларға, бапкерлерге де жауапкершілік жоғарылайды деп сенемін. Өйткені қазақ боксы әлемде теңдессіз екенін дәлелдеу бар да, сол биіктен төмендемеу де оларға серт. Бокс деген бекзада спорттың дәрежесін көтеріп, мерейін асыруға жерлесіміз зор үлес қосатынына сенімдімін»,  дейді Т.Еділов.

Олимпиаданың бағ­дарлама­сында бокс спорты орнын нығайта түсуіне жаңа ұжым күш салады деп әлем сеніп артып отыр.

Римдегі конгресте Халық­аралық бокс федерациясының вице-президенті болып Дина Гликидиспен өзге канадалық Райан О Ши, британдық Мэтт Холт сайлан­ды. Ұйымның атқарушы кеңе­сіне Майкл Мюллер (Гер­ма­ния), Викторико Варгас (Филип­пин), Тацуя Накама (Жа­пония), Маркос Кандидо де Брито (Бра­зилия) бекітілді.