Грузия ойын бизнесі саласындағы заңнаманы қатаңдатпақ

Заң жобасына сәйкес, құмар және ұтыс ойындарын өткізуге лицензиясы бар тұлғалар міндетті төлемдерді белгіленген мерзімде жүйелі түрде бұзған жағдайда, жауапкершілік шаралары едәуір күшейтіледі. Бұрын санкциялар айыппұлды үш есеге арттырумен шектелсе, енді қайталанған заң бұзушылықтар кезінде қызмет жүргізу рұқсатын қайтарып алу қарастырылған.

Үкіметтің мәліметінше, қазіргі айыппұл жүйесі тиісті алдын алу әсерін бермейді. Кейбір жағдайларда операторларға лицензия талаптарын сақтағаннан гөрі, оларды бұзып, айыппұл төлеген тиімдірек болып отыр.

Осыған байланысты лицензиялық талаптарды бұзғаны үшін айыппұл көлемін едәуір арттыру ұсынылуда. Мәселен, казинолар үшін айыппұл 7 000 лариден (шамамен 2600 АҚШ доллары) 20 000 лариге (7400 доллар) дейін өседі. Ойын автоматтары залдары үшін санкциялар 1 000 лариден (370 доллар) 10 000 лариге (3700 доллар) дейін ұлғаяды.

Ойын клубтары мен ұтыс ойындары операторлары үшін айыппұл бұрынғы 2 000 лари (740 доллар) орнына 10 000 лари (3700 доллар) болады. Сонымен қатар, лотерея, электронды ойын автоматтары және тотализатор ұйымдастырушылары үшін айыппұл 7 000 лариден (2600 доллар) 20 000 лариге (7400 доллар) дейін артады.

Аталған өзгерістер ойын индустриясын бақылауды күшейтуге, операторлардың жауапкершілігін арттыруға және лицензиялық талаптардың сақталуын қамтамасыз ететін тиімді тетіктерді қалыптастыруға бағытталған.

Еске салайық, бұған дейін ақпан айында Грузия үкіметі шетел азаматтарына такси жүргізушісі, курьер және гид болып жұмыс істеуге тыйым салған еді.

Грузияда қоғамдық тамақтану орындарында пластик бөтелкелерге тыйым салынады.