Грузия парламенті митингілер мен шерулердегі заң бұзушылықтар үшін жазаны күшейтті

Грузия парламенті Әкімшілік құқық бұзушылықтар туралы кодекске және Қылмыстық кодекске жаппай наразылыққа қатысу және полицияға бағынбау ережелерін бұзғаны үшін жазаны айтарлықтай күшейтетін түзетулерді жедел түрде қабылдады. Заң жобасына «Грузин арманы» партиясының өкілдері бастамашы болып, ол пленарлық отырыста үш оқылымда мақұлданды.

Жаңа нормаларға сәйкес, митингіде бетін бүркеу, көзден жас ағызатын газ немесе басқа да улы заттарды қолдану, сондай-ақ қатысушылар жолды жапқаны үшін 15 тәулікке дейін әкімшілік қамауға алынады, ал акцияны ұйымдастырушылар үшін бұл мерзім 20 тәулікке дейін ұзартылды.

Полиция шараны тоқтатуды талап етіп, қатысушылар бағынбаған жағдайда 60 тәулікке дейін қамауға алу жазасы қарастырылған. Осыған ұқсас жаза шара кезінде атыс қаруын немесе пиротехникалық заттарды алып жүру үшін де қарастырылып отыр.

Қылмыстық кодекске енгізілген өзгертулер қайталанатын тәртіп бұзушылықтар үшін жауапкершілікті белгілейді: екінші рет жасалған әрекет үшін бір жылға дейін және одан кейін жасалған заң бұзу үшін екі жылға дейін бас бостандығынан айыру.

Премьер-министр Ираклий Кобахидзенің айтуынша, қоғамдық жиындарда заң бұзу  үшін айыппұл тиімді емес, ал жаңа шаралар азаматтардың көпшілігінің мүдделерін қорғауға, қоғамдық тәртіпті қамтамасыз етуге және көшедегі зорлық-зомбылықтың алдын алуға бағытталған.

Заң жобасы авторлары атап өткендей, жаңа нормалар наразылық білдіру құқығы мен қоғамдық қауіпсіздік арасындағы тепе-теңдікті сақтауға, сондай-ақ радикалдардың шағын тобының жол қозғалысына кедергі келтіретін және басқа азаматтарға қауіп төндіретін теріс әрекеттердің алдын алуға бағытталып отыр.

Еске сала кетсек, 4 қазанда Грузияда жергілікті өзін-өзі басқару органдарына сайлау өтті. Грузияның Орталық сайлау комиссиясының дерегінше, бюллетеньдердің 74 пайыздан астамы саналған кезде билеуші партия 80 пайыздан астам дауыс жинаған. Екінші орында — оппозициялық «Күшті Грузия» партиясы (6,8%), ал үшінші орында «Гахария — Грузия үшін» партиясы (3,8%) тұр.

Наразылық акциясына шыққандар Тбилисидегі Атонели көшесінде орналасқан президент сарайының ауласына басып кірген. Сол жерде демонстранттар мен полицейлер арасында қақтығыс болып, құқық қорғау органдары суатқыштар мен көзден жас ағызатын газ қолданған.

Тәртіпсіздіктер кезінде 14 полицей жарақат алды.

Елде митинг ұйымдастырғандарға билікті құлатуға әрекет жасады деген айып тағылды. 

Грузиядағы тәртіпсіздікке қатысқандар саны 39 адамға жетті.