Грузияда шетелде тұратын азаматтардың сайлауға қатысуына тыйым салынады

Грузия азаматтары, егер олар Еуропа, Ресей, АҚШ және басқа елдерде тұрақты тұратын болса, енді парламенттік және муниципалдық сайлауларда дауыс бере алу үшін тек өз еліне оралуы тиіс.

Бұл норма жаңа сайлау кодексінің жобасында қарастырылғанын парламент спикері Шалва Папуашвили арнайы брифингте таныстырды, деп хабарлайды Коммерсантъ.

Спикердің айтуынша, шетелде тұратын грузиндер «елден алыста болғандықтан ақпаратты дұрыс бағалай алмайды» және «сыртқы ықпалға ұшырайды». Парламент жаңа сайлау кодексін күзгі сессияда қабылдауды жоспарлап отыр.

Қазіргі сайлау кодексі бойынша, грузин диаспорасы көп елдерде, оның ішінде Ресейде, парламенттік сайлаулар алдында сайлау округтері құрылады. Көбіне бұл округтер елшіліктер мен консулдықтар жанында орналасып, азаматтар сонда дауыс беретін. Әдетте шетелдегі грузиндер оппозицияны қолдап, билеуші «Грузин арманы» партиясына қарсы дауыс береді.

Билеуші партияның басты оппоненті – Михаил Саакашвилидің «Біртұтас ұлттық қозғалысы» Папуашвили мен «Грузин арманы» партиясын шетелде тұратын жүздеген мың грузиннің дауыс беру құқығын «алып қоюға тырысуда» деп айыптады. Келесі парламент сайлауы 2028 жылғы қазанда өтеді.

Ресми емес мәліметтер бойынша, Ресейде шамамен 160 мың, ал Еуропа елдерінде 350 мыңға жуық грузин тұрады. Әсіресе Греция, Италия, Испания, Франция және Германияда көп. АҚШ-та тұрақты тұратын 100 мыңдай азамат бар. Ал Грузияның жалпы халқы шамамен 3,9 млн адам.

Бүгін, 18:31