Гуанчжоу жәрмеңкесіндегі шетелдік сатып алушылар саны рекордтық деңгейге жетті

Алғашқы кезеңге шетелдік сатып алушылар рекордтық деңгейде қатысты. Бұл туралы жәрмеңкені ұйымдастырушы Қытайдың сыртқы сауда орталығы хабарлады.

Ресми мәліметтерге сәйкес, жексенбі күні сағат 17:00-дегі жағдай бойынша офлайн форматтағы жәрмеңкеге 216 ел мен өңірден шамамен 167 мың сатып алушы қатысқан. Бұл көрсеткіш алдыңғы жәрмеңкенің осы кезеңімен салыстырғанда 5,9 пайызға жоғары.

Ұйымдастырушылардың айтуынша, мұндай жоғары қатысу көрсеткіші – жәрмеңкенің алғашқы кезеңі тарихындағы ең жоғарғы нәтиже. Бұл Қытайдың сыртқы саудасының тұрақтылығы мен өміршеңдігін айғақтайды. «Алдыңғы қатарлы өңдеуші өнеркәсіп» тақырыбына арналған бірінші кезеңде 25 мыңнан астам стенд қойылып, 12 мыңнан аса экспонент өз өнімдерін ұсынды.

Биыл жәрмеңке үш кезеңге бөлініп өткізіледі және 5 мамырға дейін жалғасады. 23–27 сәуірге жоспарланған екінші кезең «Сапалы тұрмыстық өмір» тақырыбына арналмақ. Онда құрылыс материалдары, жиһаз, тұрмыстық заттар, сыйлықтар мен декор өнімдері ұсынылады.

Гуанчжоу жәрмеңкесі 1957 жылы құрылған және жылына екі рет Гуанчжоу қаласында өтеді. Бұл Қытайдағы ең ұзақ уақыт бойы өткізіліп келе жатқан кешенді халықаралық сауда көрмесі саналады және елдің сыртқы саудасының жағдайын көрсететін маңызды индикаторлардың бірі.

Айта кетейік, осы аптада Астанада Astana Eurasian Book Fair–2026 халықаралық кітап көрме-жәрмеңкесі өтеді.