Қазақстан алтын сатып алудан әлемде екінші орынға шығып, рекордтық деңгейге жетті

2025 жылы Қазақстан алтын сатып алу көлемі бойынша әлемде екінші орынға көтерілді, деп хабарлайды Arasha.kz.

World Gold Council (Дүниежүзілік алтын кеңесі) деректеріне сүйенсек, 2025 жылдың қаңтар-қараша айлары аралығында Қазақстан Ұлттық банкі жалпы 49 тонна алтын сатып алған. Осы көрсеткіш Қазақстанды әлемдегі ең ірі ресми алтын сатып алушылардың қатарына шығарды.

Алтын сатып алу бойынша көш басында Польша Ұлттық банкі тұр. Ол есепті кезеңде шамамен 95 тонна бағалы металл сатып алған. Үшінші орынға Бразилия жайғасып, өз алтын қорын 43 тоннаға арттырды. Сондай-ақ алғашқы бестікке Түркия (27 тонна) мен Қытай (26 тонна) кірді.

Дүниежүзілік алтын кеңесінің дерегінше, 2025 жылдың қараша айында орталық банктердің алтынға деген сұранысы жоғары деңгейде сақталғанымен, сатып алу көлемі қазан айымен салыстырғанда азайған. Қараша айында орталық банктер барлығы 45 тонна алтын сатып алған.

Осы айда Қазақстан Ұлттық банкі 8 тонна алтын сатып алып, ең белсенді төрт орталық банктің қатарына енді. Ал қараша айындағы көшбасшылар – Польша мен Бразилия болды: олар тиісінше 12 және 11 тонна алтын сатып алған. Белсенді сатып алушылар қатарында Өзбекстан (10 тонна), Қырғызстан (2 тонна), Чехия (2 тонна), сондай-ақ Қытай мен Индонезия (әрқайсысы 1 тонна) бар.

Сарапшылардың пікірінше, алтын қорын ұлғайту – геосаяси тұрақсыздық пен инфляциялық тәуекелдер жағдайында ұлттық резервтерді қорғаудың маңызды құралы. Осы тұрғыда Қазақстанның алтын сатып алу стратегиясы халықаралық қаржы нарығында айрықша назарға ілінді.