Халық талабы ескеріледі

Президент  қа­ты­­суымен өткен форум барысында біз бір­сыпыра тәжірибе алмасып, өзара пікір бөлістік. Сондай-ақ алда атқарылатын жұ­­мыс­тар бойынша нақты тапсырма­лар берілді.

Бұрынғы кезең­мен салыстыр­ғанда, қазір сайланбалы жүйемен әкім болып отырғанымыздың өзі – ха­лықтың талабына жауап бере­­тін, халыққа құлақ асатын мем­лекет құрудың маңызды қадамы.

Бүгінгі форумда да осы бағыт­­тағы нақты саясатты жүзе­ге асыру жөнінде күрделі мәсе­лелер талқыланды. Соның ішін­де ерекше атап өтетін жайт – Президентіміздің бастамасымен жүргізіліп жатқан «Таза Қазақстан» экологиялық акциясы. Бұл бастаманы бүкіл ел қолдап жатыр, біз де ауыл тұрғындарымен бірге белсене атсалысып келеміз. Халықтың бұл іске белсенді араласуы үлкен жетістік деп ойлаймын.

Форумда басқа да әкімдер өз ойларымен бөлісіп, ауыл әкім­дері­не мотивация беретін жақсы ұсыныстар айтты. Бұл – біз үшін үлкен көрсеткіш. Барлығымыздың ортақ мақсатымыз – халықтың тұрмысын жақсартуға үлес қосу. Мемлекет басшысының «Ауыл аманаты» бағдарламасы аясында да көптеген отбасының жағдайы түзеліп келеді. 2,5 пайыздық несие арқылы ауыл тұрғын­дары өз кәсібін ашып, дамытып жатыр. Бұл кәсіптің өркендеуіне ғана емес, ауылдың кіріс көзін ұлғайтуға да зор серпін беріп отыр.

Сонымен қатар форумда ауыл әкімдік­терінің кіріс көзін көбейту мәселесі де қозғалды. Бұған дейін аудандық немесе облыстық бюджетке түсіп келген кейбір кірістерді ауыл әкімдігінің қарамағына беру жөнінде тапсырмалар берілді. Бұл қадам ауыл әкімдіктерінің өздігінен дамуына үлкен мүмкіндік туғызбақ.

Ауыл әкімдерінің сайланбалы жүйесіне келсек, бұл – өте дұрыс қадам деп санаймын. Өзім Қордай ауылдық округіне екінші рет сайланып отырмын. Бұрын кейбір тұрғындар ауыл әкімін мүлдем танымайтын. Ал қазіргі жүйе бо­йынша түрлі кандидаттар шығып, халық олармен танысады, олар­дың бағдарламаларын зерделей­ді. Кейін сол бағдар­ламалардың орындалуын ауыл тұрғындарының өздері бақылай алады.

Әділет ҚАСПАҚБАЕВ,

Қордай ауылдық округінің әкімі

Жамбыл облысы,

Қордай ауданы