Илон Маск: Optimus роботы хирургтен асып түседі

«Гуманоидты робот әлемдегі ең мықты деген хирургтан да асып түседі». Оптимус құлтемірін ойлап тапқан Илон Маск осы сөзіне кәміл сенеді. Америкалық кәсіпкердің айтуынша, Оптимус адамзат баласына ең жоғарғы медициналық қызмет түрін ұсына алады. Маск мұнымен шектеліп қалмақ емес. Тіпті әлемде кедейлік дегенді толық жоюға болады деп отыр.

Бұған дейін адам тектес роботтың үй шаруасына көмектесіп, тамақ пісіріп, тіпті, кунг-фумен айналысқанын талай көрдік. Бірақ Илон Маск мұнымен тоқтап қалғысы жоқ. Жасанды сана иесін одан әрі жетілдірмек. Ол келер жылдың басында көпшілікке Оптимустың жаңа нұсқасы таныстырылатынын жеткізді. Сөйтіп, роботтардың хирургсыз-ақ ота жасайтын күні алыс еместігін айтады. Сөзінше, адамзат баласының қолынан келмейтін дәлдік роботқа тән. Олар ең қиын деген медициналық емшараларды орындайды.

Илон Маск, кәсіпкер:

- Адамдар кедейліктің жойылуы және сапалы медициналық қызмет жайлы жиі айтады. Бұл тек Optimus роботының көмегімен іске асады. Гуманоидты роботтар арқылы шын мәнінде әр азаматқа жоғары деңгейлі медициналық қызмет көрсетуге болады. Түбінде Optimus кез келген хирургтан асып түседі.

Адам тектес роботтар қазірдің өзінде әлемнің көптеген медициналық мекемелерінде ота жасауға қатысады. Мәселен, Берлиндегі ауруханада роботтың көмегімен жүрек қақпақшаларында ақауы бар немесе ишемиялық ауруға шалдыққан науқастарға кеуде қуысын толық кеспестен ота жасауға мүмкіндік бар. Нәтижесінде науқастардың отадан кейін қалпына келуіне көп уақыт кетпейді. Алайда бұл роботтар өздігінен жұмыс істемейді. Адамның басқаруымен әрекет етеді.

Волкмар Фальк, кардиология орталығының медицина жетекшісі:

- Бүгінде ауруханамызда бұл технология арқылы 260 операция жасалды. Жүйенің келесі буыны нарыққа 2026 жылы шығады. Қазіргіге қарағанда әлдеқайда дамыған.

Ал Қытай адам тектес роботтардың жаппай өндірісіне кірісті. 2025 жылдың алғашқы 9 айында 50 млрд юань көлеміндегі 600-ден астам инвестициялық жобаға қол қойылды. Бұл өткен жылдың осы кезеңімен салыстырғанда 2,5 есе көп. Жаңа құлтемірлер ірі автозауыттар мен технологиялық компанияларда ғана емес, медицинада да кеңінен қолданылады. Озық технологияның көмегімен қытайлық дәрігерлер алғаш рет хромосомалар жиынтығын анықтайтын құрылғы ойлап тапты. Ол жасушаларды сканерлеп, хромосомалық бұзылыстарды небәрі 4 күнде анықтауға мүмкіндік береді. Мұны ерте анықтаудың маңызы зор. Өйткені хромосомалардың құрылымы не санының өзгеруі Даун синдромы сынды туа біткен ауруларға себеп болады.

Сон Нин, репродуктивті денсаулықты жақсарту  технологияларының негізін қалаушы:

- Дәстүрлі микроскопиялық технология арқылы дәрігерлер әр хромосоманы санап отырады. Қандай да бір бұзылыстарды анықтап, нәтижені алу үшін бір айға дейін уақыт кетеді. Ал бұл әдіс жұмысты әлдеқайда жеңілдетеді. Қазір құрылғы Қытайдың 400-ден астам ауруханасында пайдаланылады. Ұлыбритания, Бразилиядан тапсырыстар түсіп жатыр.

Әйтсе де ет пен сүйектен жаралған адамзат баласының ақыл-ойын, сана-түйсігін робот алмастыра алатынына күмән бар. Әзірге олар тек дәрігерлердің жұмысын оңтайландырып, көмекшінің рөлін атқарады.

Жақында Ресейде алғашқы гуманоидты роботтың таныстырылымы өтті. Құлтемірдің сахнаға шығуы сол-ақ екен, аяғын әр жерден бір басып, тәлтіректеген күйі етбетінен құлап түсті. Оны жасап шығарған компания мұны техникалық ақаулармен байланыстырды. Соған қарағанда робот хирургтың орнын басады деп айтуға әлі тым ерте.

Авторы: Мөлдір Жақан