Иран АҚШ пен Израиль шабуылдарынан келген шығынды $270 млрд деп бағалады

Иран үкіметінің ресми өкілі Фатеме Мохаджеранидің айтуынша, бұл әзірге алдын ала есеп. Нақты сома бірнеше кезеңнен тұратын арнайы бағалау рәсімінен кейін жарияланады. Оның сөзінше, әскери репарациялар мәселесі Иран делегациясы тарапынан бірнеше келіссөзде, соның ішінде Исламабадтағы кездесулерде көтерілген.

Сондай-ақ Иранның БҰҰ жанындағы тұрақты өкілі Амир Саид Иравани АҚШ пен Израиль операцияларына өз аумағын пайдалануға мүмкіндік берді деп есептелетін бірқатар өңір елдерінен де өтемақы талап етілетінін мәлімдеді. Әңгіме Бахрейн, Сауд Арабиясы, Қатар, Біріккен Араб Әмірліктері және Иордания туралы болып отыр.

Тегеранның мәлімдеуінше, шабуылдар салдарынан өнеркәсіп нысандары, инфрақұрылым және энергетика секторына елеулі залал келген. Қазір бүлінген нысандарды түгендеу және бюджет кірісіндегі шығындарды есептеу жұмыстары жалғасып жатыр.

Еске сала кетсек, Иран АҚШ-тың блокадасына жауап ретінде Қызыл теңізді жабуға ниетті екенін айтты.

Ал Пәкістан делегациясы АҚШ-пен келіссөздерді жалғастыру үшін Иранға келді.