​Иран Парсы шығанағындағы нысандарға зымыран және дрондармен шабуыл жасады: АҚШ қарымта соққы берді

Таяу Шығыстағы жағдай күрт ушығып кетті. АҚШ Қарулы Күштері Парсы шығанағындағы кемелер мен көршілес араб елдеріне қарай ұшырылған ирандық ұшқышсыз ұшу аппараттары (дрон) мен баллистикалық зымырандардың бетін қайтарғанын мәлімдеді. Бұған жауап ретінде Америка авиациясы Иран аумағына соққы берді, деп хабарлайды BBC АҚШ Орталық қолбасшылығына (Centcom) сілтеме жасап.

Америкалық әскерилердің мәліметінше, «өзін-өзі қорғау» мақсатындағы қарымта соққы стратегиялық маңызы бар Ормуз бұғазындағы Кешм аралына жасалған. Онда Иранның әскери басқару пункті жойылды.

АҚШ тарапынан мұндай қатаң жауап қайтарылуына Иран тарапынан жасалған жаппай зымыран ұшыру әрекеттері себеп болды:

Екі баллистикалық зымыран Кувейт бағытына қарай ұшырылған, бірақ олар нысанаға жетпей, ауада қирап қалған;

Үш зымыранды Иран Бахрейнге қарай жіберген — олардың барлығын әуе шабуылына қарсы қорғаныс (ӘШҚО) жүйелері сәтті атып түсірді;

Үш жауынгерлік дронды АҚШ күштері азаматтық сауда кемелеріне шабуыл жасамақ болған сәтте атып түсірген.

Өз кезегінде, Иранның Ислам революциясы сақшылар корпусы (ИРСК) өздерінің зымырандары мен ұшқышсыз аппараттары аймақтағы Американың әскери базалары мен тікұшақтарына сәтті соққы бергенін мәлімдеді. Тегеран өз әрекеттерін «америкалықтардың Кешм аралының оңтүстігіндегі байланыс мұнарасын жоюына қайтарылған жауап» деп атады.

Қақтығыстың ушығуы аймақтағы үш айдан астам уақытқа созылған көлік блокадасымен тікелей байланысты. Иран Ормуз бұғазын АҚШ пен Израильдің одақтастары үшін толықтай жауып тастаған. Бұған жауап ретінде АҚШ 13 сәуірден бастап Иран порттарына бет алған кез келген кеме үшін айналық (зеркальная) блокада енгізді.

Осы жолғы зымырандық шабуылдың алдында ғана Centcom америкалық әскерилердің бос тұрған «M/T Lexie» танкерінің (Ботсвана туымен Иранның Харк мұнай аралына бара жатқан) машина бөліміне Hellfire зымыранын атып жатқан сәті түсірілген видеожазбаны жариялады.

«Кеме АҚШ Әскери-теңіз күштерінің қозғалысты тоқтату туралы бірнеше мәрте жасаған ескертуін мүлдем елеусіз қалдырды», — деп атап өтті АҚШ қолбасшылығы. Ресми Тегеран бұл танкер оқиғасына қатысты әлі ешқандай түсініктеме берген жоқ.

Пентагонның мәліметінше, Ормуз бұғазында Америка блокадасы басталған сәттен бері алты сауда кемесі істен шығарылған, ал тағы 122 азаматтық кемені әскерилер мәжбүрлі түрде кері бұрып, басқа бағыттарға жіберуге мәжбүр болған. Аймақтағы отты тоқтату туралы келіссөздер соңғы күндері біржола тығырыққа тірелді.

Бүгін, 12:09