Израиль оңтүстік Ливанға жойқын соққы жасады

Израиль оңтүстік Ливанға жойқын әуе және құрлық шабуылдарын жасады, деп хабарлайды АА.

Елдің кейбір аймақтарында израильдік әскери қызметкерлер инженерлік техникамен ғимараттарды қиратып жатыр.

NNA дерегіне сәйкес, Израиль ӘӘК ұшақтары Сур ауданына қарасты Аль‑Мансури елді мекеніне массалық әуе соққысын жасаған. Шабуылдың адам шығынына немесе материалдық залалға әкелгені туралы ақпарат берілмеген.

Хабарламада Израиль әскері Сурдың оңтүстігіндегі Буют‑эс‑Сийяд елді мекенін атқылағаны, одан кейін Аль‑Мансуриде БПЛА үйлерге жарылғыш зат салынған бөшкелерді тастағаны және әскери ұшақтардың екінші рет соққы жасағаны айтылған. Сондай‑ақ, Аль‑Мансури үстінде жарылғыш затпен жабдықталған дрон жарылып, «Меркава» танкі елді мекенге көптеген артиллериялық снаряд атқан.

Израиль күштері Буют‑эс‑Сийядтағы бірнеше үйді өртеп, Мадждаль‑Зунда жарылыс жасаған, ал Хадаса маңын артиллериямен атқылаған. Хула елді мекенінде инженерлік техника көптеген ғимаратты қиратқан, Бани‑Хайян да артиллериялық шабуылға ұшыраған. Давхат‑Кефр‑Румман ауданы мен Дабша төбесі маңы да мерзімді түрде атқыланып отыр.

Бинт‑Джубайль қаласына қарасты Сарбин елді мекенінде Израиль әскері барлау шараларымен қатар күшті соққылар жасап, әскери ұшақтар екі рет бомбалаған. Авиация Бейт‑Лиф пен Ятер арасындағы аумақты да атқылаған. Сонымен қатар, Марджайюн ауданындағы Эль‑Кантара елді мекеніне түнгі әуе соққысы жасалып, Аль‑Хардали жолы маңындағы Литани өзенінің арнасы қарқынды артиллериялық шабуылға ұшыраған.

Параллель түрде Израильдің дрондары Бейрут қаласы үстінде, оңтүстіктегі Дахия ауданында және елдің оңтүстігіндегі Захрани аймағында төмен биіктікте ұшқан.

Ливан билігінің дерегінше, 2026 жылғы 2 наурыздан басталған шабуылдардан бері 4350 адам қаза тауып, 12 307 адам жараланған, 1 миллионнан астам тұрғын үйлерін тастап кетуге мәжбүр болған. Қазіргі шабуылдар барысында Израиль күштерінің Ливан аумағына енуі кей жерлерде 10 шақырымнан асқан.

Бүгін, 12:53