Израильде Кнессет сайлауы 27 қазанда өтеді

Израиль Кнессетінің комиссиясы парламенттің 26-шы шақырылымына сайлау күнін ресми түрде бекітті, деп хабарлайды Евронью́с.

Дауыс беру 27 қазанда, заңда белгіленген соңғы мерзімде өтеді. Қазіргі құрамның өкілеттігі 17 шілдеде аяқталады, ал осы аптадан бастап парламент пен үкімет сайлауалды кезеңге өтеді.

Бұл оқиға елдің саяси жүйесінде ерекше жағдай болып отыр: соңғы 38 жылда алғаш рет сайлау дәл заңда көрсетілген мерзімде ұйымдастырылмақ. Сонымен қатар қазіргі кабинет 53 жылдан бері алғаш рет өз өкілеттігін толық аяқтап, мерзімінен бұрын таратылмай отыр.

Премьер-министр Биньямин Нетаньяху үкіметі 17 шілдеден бастап ресми түрде өтпелі мәртебеге көшеді. 76 жастағы «Ликуд» партиясының жетекшісі ел тарихындағы ең ұзақ уақыт билік еткен премьер болып саналады. Ол 2009 жылдан бері қысқа үзіліспен билікте және алдағы сайлауға қайта қатысады.

Нетаньяху жуырда «ұлттық бірлік үкіметін» құру ниетін білдірген. Оның бұл мәлімдемесін сарапшылар саяси қарсыластарға бағытталған қадам әрі сайлауалды стратегияның өзгерісі ретінде бағалап отыр.

Израиль Демократия институтының маусымдағы сауалнамасына сәйкес, халықтың 61%-ы Нетаньяхудың қайтадан премьерлікке үміткер болуын қаламайды.

Алдағы сайлауда оның басты қарсыласы ретінде Израиль Қорғаныс армиясының бұрынғы Бас штабының бастығы Гади Айзенкот аталып отыр.

Бүгін, 15:07