Израильдің Ливанның оңтүстігіне шабуылынан Сирия тұрғыны мерт болды

Бұл туралы Ливан Денсаулық сақтау министрлігінің шұғыл операциялар орталығы хабарлады.

Ведомствоның мәліметінше, жараланғандардың арасында бір сириялық және алты Ливан азаматы бар, оның екеуі әйел. Шабуылдар Ливан парламенті спикері Набих Берридің Мсайледегі резиденциясынан бірнеше жүз метр қашықтықта болған.

Ливан президенті Жозеф Аун бұл оқиғаға байланысты мәлімдеме жасап, Израильдің әрекеттерін айыптады.

«Оңтүстік Ливан тағы да ешқандай себепсіз және ақтауға келмейтін Израильдің азаматтық нысандарға қарсы агрессиясына ұшырады», — деді ол.

Президенттің айтуынша, соңғы шабуылдың қауіптілігі — ол Газа секторында атысты тоқтату туралы келісім жасалғаннан кейін болғанында.

Израиль Қорғаныс армиясы (ЦАХАЛ) өз кезегінде Ливанның оңтүстігінде «Хезболла» қозғалысының террористік инфрақұрылымын жою бойынша операция жүргізгенін хабарлады.

Мәлімдемеде: «Хезболла» ел аумағында террористік инфрақұрылымды қалпына келтіруге тырысып, бейбіт тұрғындарды тірі қалқан ретінде пайдалануды қояр емес. Израиль Қорғаныс армиясы мемлекет қауіпсіздігіне төнген кез келген қатерді жою жұмысын жалғастырады», — делінген.

Ливандық L'Orient le Jour газетінің мәліметінше, жойғыш ұшақтар құрылыс техникасы сақталған нысанға онға жуық зымыран атқан. Жарылыстардың дауысы Сайда, Набатия қалаларында және Захрани өзені бойындағы бірнеше ауылда естілген.

Ливанның мемлекеттік NNA ақпарат агенттігінің хабарлауынша, соққылар нәтижесінде 300-ден астам құрылыс техникасы, соның ішінде 100-ден астам шағын Bobcat маркалы машиналар жойылған. Зақымданған нысандар Ливандағы ең ірі және маңызды техникалық қоймалардың бірі болып саналады, ал келтірілген залал жүздеген миллион доллар деп бағаланып отыр.

27 қараша 2024 жылдан бастап күшіне енген атысты тоқтату режиміне қарамастан, Израиль Ливан аумағындағы шабуылдарын жалғастырып келеді. Израиль тарапы олардың нысанасы елдің оңтүстігінде орналасқан «Хезболла» қозғалысының содырлары мен инфрақұрылымы екенін мәлімдеді.

БҰҰ дерегінше, атысты тоқтату күшіне енгеннен бері Ливанда 103 бейбіт тұрғын қаза тапқан.

Осыған дейін БҰҰ Ливандағы бітімгерлік миссиясын аяқтайтыны туралы жаздық.