Кәрі құрлықтағы ең бақытты ел

Қазақстан жаһандағы дамыған 30 елдің қатарына кіруді көздейді. Озық елдермен терезе теңестіру үшін ұдайы тәжірибе алмасу маңызды.

Бұл ретте дамудың даңғыл жолына түскен, үздік елдердің үштігіндегі Финляндияның орны айрықша. Еліміз тәуелсіздігін алып, іргелі ел болғаннан кейін, 1992 жылдан бастап екі ел арасында дипломатиялық қарым-қатынас орнады. 

Бүгінде Қазақстан-Финляндия қарым-қатынастары жоғарғы деңгейге шығып, екі мемлекет халықаралық және өңірлік маңызды мәселелер бойынша бір-біріне белсенді қолдау көрсетіп отырған сенімді серіктес және саяси әріптес.

Финляндия - Солтүстік Еуропада орналасқан, тұмса табиғатымен танымал, 5 жарым миллион халқы бар, аумағы кішкентай мемлекет. Біріккен Ұлттар ұйымының «бақыт индексі» бойынша әлемдегі ең бақытты ел саналады. Экономикасы тұрақты, өмір сүру сапасы жоғары. Десе де, мұндай артықшылықтар финдіктерге жылдар тоғысындағы өзгерістердің нәтижесінде келген.

Элина Валтонен, Финляндия Сыртқы істер министрі, ЕҚЫҰ төрағасы:

- Финляндия осымен сегізінші жыл қатарынан - әлемдегі ең бақытты ел атағын алып отыр. Дегенмен 100 жыл бұрын Еуропадағы ең кедей ел болатын.  Иә, біз бұған оңай қол жеткізген жоқпыз. Жер қойнауынан алынатын қазба байлықтарымыз болмаса да, табиғат сыйлаған тамаша ландшафттың арқасында туризмді ілгерілеттік. Елде әлеуметтің әл-ауқаты, білім саласы, инфрақұрылымды дамыту, энергетика, технологияға ерекше басымдық беріледі.

Финляндия экономикасының негізгі табыс көзі - орман шаруашылығы. Ел аумағының 70 пайызы жасыл-желекке оранған. 70-80 жылдардан бастап ағаш өңдеу мен қағаз өнеркәсібі дамып, қазірде аталған сала бойынша әлемде көш бастап тұр. Сонымен қатар фин елі әлем халқына «мың көл елі» деген атаумен де танымал. Ел аумағының 10 пайызын 50 мыңнан астам көл алып жатыр. ЮНЕСКО-ның мәліметі бойынша Финляндия жер асты суларының сапасы бойынша әлемде бірінші орында. 

Қазақстан 1992 жылдан бері Еуропалық ынтымақтастық және қауіпсіздік ұйымының мүшесі. Халықаралық құқық төңірігенде Финляндия мен Қазақстанның ұстанымы бір. Ал аумалы-төкпелі заманда ортақ пікірлердің бір арнада тоғысуы маңызды дейді, ұйым төрағасы. 

Элина Валтонен, Финляндия Сыртқы істер министрі, ЕҚЫҰ төрағасы:

- Қазақстанмен көп мәселеге қатысты көзқарасымыз ұқсас. Егемендігін, аумақтық тұтастығын бейбіт жағдайда сақтай білген ел қашанда жақсы қоғам қалыптастыруда жетекші бола алады. Өйткені геосаяси шиеліністер ушығып тұрған уақытта берік ұстаным қалыптастыру маңызды.

Фин елінің отыз елдің қатарынан ойып тұрып орын алуы - табиғи ерекшеліктерімен қатар, елдің тұрақтылыққа негізделген экономикасының жемісі. Қазіргі Финляндия прогрестің, инновацияның және әлеуметтік бірліктің жарқын үлгісі болары сөзсіз.    

Авторы: Фариза Жанғанаева