КарЛАГ та тұтқында болған испандықтар туралы фильм экранға шықты

Қазақстан мен Испания бірлесіп түсірген «Бітім» фильмі үлкен экранға жол тартты.

Тарихи драманың тұсаукесері Алматыда өтті. Картина оқиғасы КарЛАГ-та тұтқында болған испан офицерлері төңірегінде өрбиді. Фильмнің режисері Мигель Анхель Вивас. Ол көрерменге «Қағаз үй», «Элита» сериалдарымен танымал.

Фильм 1930-1940 жылдары КарЛАГ-та тұтқында болған испандықтардың тағдырын бейнелейді. Екі  офицер, лейтенант Сальгадо мен капитан Рейес, Қарағандыдағы мәжбүрлі еңбек лагерінде кездеседі. Испаниядағы азамат соғысы кезінде қас жауға айналған екеу енді аман қалу үшін бітімге  келуге мәжбүр болады. Басты рольдерді танымал Испания актерлері Арон Пайпер мен Мигель Эрран сомдайды. Ал, қазақ қызы Айсұлуды Дина Тасболатова ойнайды.

Дина Тасболатова, актриса:

- Фильмде мен басты әйел кейіпкер Айсұлу есімді медбикені сомдадым. Түсірілім алдында қатты қобалжыдым, себебі бұл менің алғашқы халықаралық жобам болды. Сондықтан, қатты уайымдадым. Бірақ, түсірілім кезінде актерлар бір-бірімізді барынша қолдадық.  Испандық әріптестерім өз ісінің шеберлері. Олармен бір алаңда жұмыс істеу ешқандай қиындық келтірмеді. 

«Бітім» - тарихи оқиғаларға негізделген көркем фильм. Сталиндік репрессия кезінде қазақ жеріндегі Карлагта азамат соғысына қатысқан жүздеген испандықтар да жазасын өтеген. 2013 жылы Қазақстан жағы Испания премьер-министрі Мариано Рахойға испан тұтқындарының мұрағаттағы 152 ісін  тапсырды. Дәл осы шара мен қазақ жеріндегі халықтар достығы сценарий жазуға түрткі болды. 

Марат Әбсеметов, тарихшы, фильм кеңесшісі:

- Испандықтар бұлар анау франка мен республиканецтер ата жау бұлар, бұлар шайқас болған. Анау республиканецтердің орнынына  франкистар келген. Сол франкистар басып алған. Содан кейін бұлар бір-бірімен шабысқан. Түрмеге түскенде бірге болып қалған бұлар. Содан бірге болған да ол жерде ол кезде совет үкімет қарамады франкиссің ба республикансың ба, әйтеуір сен испандықсың болды. Сондықтан бұлар татуласуға мәжбүр болды. 

Фильмнің тұсаукесері аншлагпен өтті. Испания тарапынан актерлардың келмегеніне  қарамастан, кинотеатр көрермендерге толы болды. КарЛАГ тұтқындарының ұрпақтары, ғалымдар, Қазақстан мен Испанияның ортақ тарихына қызығушылық танытқан қауым осыннан табылды.

Арман Жұманиязова, қала тұрғыны:

- Менің атам Қадем Жұманиязов. Ол барлаушы офицер болған. Ол жас кезінде Екінші дүниежүзілік соғыстың алдында Францияда және  Испанияда болған. Фильмде менің атамның тағдырына ұқсас жайттар бар. Ол да француз қызы Элен Гюставқа ғашық болады. Бұл туралы күнделігінде көп жазған. Бірақ бәрі біз ойлағандай бола бермейді ғой. Ол махаббатын емес, Отанын таңдаған.

«Бітім» тарихи драмасы қыркүйек айында Сан-Себастьян кинофестивалінде көрсетілген болатын. Енді  өз елімізде үлкен экранға шығып көрерменге жол тартты.

Қарлығаш Қайыпбекова,  Радик Джакупов