Кейбір кәсіп иелері табыс салығынан босатылды

Биылдан бастап кейбір кәсіп иелері табыс салығын төлемейді. Бұлардың қатарында таксистер мен курьерлер, пәтерді жалға беретіндер мен шаштараздар бар.

Яғни аталған кәсіп түрімен нан тауып жүргендер жеке кәсіпкерлік нысанын ашуы қажеті жоқ. Оларға салық қалай есептеледі? 

Биылдан бастап өзін-өзі жұмыспен қамтып отырған азаматтардың жеке кәсіпкер ретінде тіркелуінің қажет жоқ. Ол үшін жаңа салық кодексінде арнаулы салық режимі енгізілген. Соның арқасында бұл азаматтар салықтан толық босатылады. Тек «е-салық бизнес» қосымшасын жүктеп алса жеткілікті. Көрсеткен қызметіне қарай чек шығарып, кәсібін заңды түрде дөңгелете береді.

Раушан Жаппарқызы, Есіл ауданы бойынша Мемлекеттік кірістер басқармасы бөлімінің басшысы:

- Өзін-өзі қамту, яғни 300 МРП-дан аспауы керек. Айлық табысы 1 млн 300 мыңнан аспағандар, олар – таксистер, үйлерді арнедаға беретін адамдар. Олар салық өзінің табысы бойынша есептеледі. Тек қана зейнетақы, әлеуметтік аударымдар, медициналық сақтандыру, яғни әлеуметтік төлемдер бойынша 4 пайыз салық төлейді. Ал табыс салығынан босатылады.

Ал қосылған құн салығының базалық мөлшерлемесі 12-ден 16 пайызға өсті. Дегенмен бұл өсімнің әлеуметтік маңызы бар салаларға қатысы жоқ. Мәселен, кітап басу, ғылыми зерттеу және археологиялық жұмыстар, тегін медициналық көмек пен әлеуметтік сақтандыру қызметтеріне қосылған құн салығы төленбейді. Жаңа кодекстегі осы және басқа да өзгерістерді түсіндіру мақсатында «Халық бухгалтері» акциясы іске қосылды. Аты атап тұрғандай іс-шараға бухгалтерлер де қатысып, тұрғындарға кеңес береді.

Әсем Көбентайқызы, бухгалтер:

- Бұл - салық төлеушілер мен салық органдары арасында өте жақсы тәжірибе деп айтар едім. Жаңа салық кодексін түсіндіруде тиімді болып отыр. Осы іс-шара арқасында жүздеген адам кеңес алды. Көбінесе тұрғындар арнаулы салық режимі туралы түсіндіруді сұрайды.

Акция аясында маман кеңесіне жүгініп жатқандар көп. Бүгінге дейін Есіл ауданы бойынша мемлекеттік кірістер басқармасында 300-ден астам салық төлеушіге кеңес берілді. Науқан маусымның соңына дейін барлық аудандық басқармаларда жалғасады.

Авторлары: Нұрқанат Қанапия, Диас Қобланбаев