Келінге телефон алып беру үшін 1 миллион теңгеге несие рәсімдедік : Сұлтан Сәрсемалиевтің анасы сұхбат берді (ВИДЕО)

Атырау облысында жасалған ауыр қылмысқа байланысты күдікті ретінде марқұмдардың 29 жастағы күйеу баласы – Махамбет ауданының тұрғыны Сұлтан Сәрсемалиев аталды, деп Arasha.kz сайты журналист Жанат Молдашованың Instagram парақшасына сілтеме жасап хабарлайды.

Күдіктінің анасы Гүлнәр Әзмұханова ұлының мұндай әрекетке баруына сенбейтінін айтып, оның мінезі сабырлы, тәртіпті болғанын жеткізді. Оның сөзінше, Сұлтан жұбайын төркініне апару үшін емес, дәрігерге көрсету мақсатында Атырау қаласына алып кеткен. Сонымен қатар, бірнеше күн бұрын несие төлемі үшін ақша аударғанын да айтты.

"Мен баламды олай тәрбиелеген жоқпын. Ол – тәртіпті, жуас бала. Мұндай іске баруы мүмкін емес. Әкесі қатал, содан қорқып өскен. Соңғы рет желтоқсанның 21-і күні ұлымнан 45 мың теңге түсті. Келінге ұялы телефон алып беру үшін 1 миллион теңге несие рәсімдеткен едік", – дейді күдіктінің анасы.

Анасының айтуынша, келіні І топтағы мүгедек әрі психиатриялық есепте тұрған. Төртінші баласынан кейін жүйке жүйесінде өзгерістер байқалып, сол себепті Сұлтан оны жиі дәрігерге апарып жүрген. Бұл жолы да бес баласын ата-әжесіне қалдырған. Қазіргі таңда немерелер ата-әжесінің қамқорлығында.

"11 желтоқсан күні хабарластым. Атыраудамын деді. Бір айтқанын түсінбей, нақтылап сұрадым, сол кезде видеоқоңырауға шықты. Балалардың суретін көрсетіп, "міне, балаларың аман, өзің қалайсың, Ақбаян қалай?" деп сұрадым. "Жақсымын, уайымдама, тағы хабарласамын" деді. Содан кейін байланыс үзілді. Шетелге кетемін деп ештеңе айтпаған. Тек қалаға апарып емдетіп алып келемін деген", – дейді Гүлнәр Әзмұханова.

Әлеуметтік қызмет өкілдерінің мәліметінше, ата-анасы ресми түрде хабар-ошарсыз деп танылған жағдайда ғана балаларға қатысты қорғаншылық мәселесі қаралады. Қазіргі уақытта оларды бейімдеу орталығына немесе балалар үйіне орналастыру мәселесі күн тәртібінде жоқ.

Полиция күдіктіге іздеу жарияланғанын хабарлады. Тергеу барысында оның жалдап тұрған үйінің маңы тексеріліп, арнайы техника мен георадар қолданылуда. Сонымен қатар, қылмысқа өзге тұлғалардың қатысы бар-жоғы да анықталып жатыр.