Көкшетауда қайтарылған активтер есебінен халықаралық деңгейдегі спорт кешені салынып жатыр

Ақмола облысының прокуроры Руфат Құттықов прокуратура органдарымен мемлекетке қайтарылған активтер есебінен Көкшетау қаласында әлеуметтік нысанның халықаралық деңгейдегі спорттық кешеннің құрылысының барысымен танысты, – деп хабарлайды Aikyn.kz сайты.

Болашақ спорткомплекс олимпиадалық стандартқа сай сертификатталған жабдықтармен қамтамасыз етіледі. Бұл облыс орталығында Халықаралық бокс қауымдастығының (IBA) желісі бойынша республикалық және әлемдік деңгейдегі жарыстар өткізуге мүмкіндік береді.

Бүгінгі таңда негізгі құрылыс жұмыстары аяқталған. Ішкі әрлеу, инженерлік желілерді орнату және іргелес аумақты абаттандыру жұмыстары жүргізіліп жатыр.

Спорттық кешенді пайдалануға беру ағымдағы жылдың соңына дейін жоспарланған.

Жобаның жүзеге асырылуы облыс орталығының тұрғындары үшін спорт инфрақұрылымының қолжетімділігін айтарлықтай арттыруға мүмкіндік береді.