Корея мен Орталық Азия серіктестігі әлемдік дамудың кепілі

Астана қаласында өтіп жатқан ІІ Astana Think Tank Forum-2025 халықаралық форумының «Бірполярлық дәуірдің аяқталуы: Күштер тепе-теңдігінің өзгеруі және көпжақтылықтың болашағы» атты кезекті сессиясында сөз сөйлеген Оңтүстік Корея Республикасының өкілі, Корея қоры жанындағы Корея-Орталық Азия ынтымақтастық форумы хатшылығының атқарушы директоры Чон Гук Ри Корея мен Орталық Азия елдері арасындағы көпжақты ынтымақтастықтың маңызы туралы баяндама жасап, тараптардың ынтымақтастығы жаңа белеске шыққанын атап өтті.

Сондай-ақ ол қазіргі күрделі халықаралық жағдайда көпжақты әріптестіктің де рөлі күшейіп отырғанын жеткізді.

– Бүгінде әлем көпполярлықтан кейінгі жаңа кезеңге аяқ басты. Мұндай жағдайда халықаралық ынтымақтастықтың өзегі ретінде Орталық Азияның маңызы артып келеді, – деді спикер.

Корея мен Орталық Азия елдері арасындағы дипломатиялық қатынастар 1992 жылы орнағанын атап өткен ол соңғы 30 жылда саясат, экономика және мәдениет салаларындағы байланыстар тұрақты түрде кеңейіп келе жатқанына тоқталды.

– Егер 1990 жылдары екіжақты сауда айналымы небәрі 200 миллион доллар болса, бүгінде бұл көрсеткіш шамамен 9 миллиард долларға жеткен. 

Корея мен Орталық Азия арасындағы қарым-қатынастың жаңа кезеңі 2007 жылы басталды. Сол жылы екі тарап Корея – Орталық Азия ынтымақтастық форумын құрып, өзара іс-қимылды институционалды деңгейге көтерді. Ал 2017 жылы форум шешімдерін жүйелі түрде іске асыру үшін тұрақты хатшылық құрылды, – деді ол.

Баяндамашының айтуынша, Корея мен Орталық Азия арасындағы серіктестік аймақтың тұрақтылығын нығайтып қана қоймай, жаһандық ынтымақтастықты да ілгерілетуге ықпал етіп отыр.

Еске сала кетсек, елордада өтіп жатқан ІІ Astana Think Tank Forum-2025 халықаралық форумында Сыртқы істер министрінің бірінші орынбасары Ержан Ашықбаевтың геосаяси текетірестер әлемдік экономикаға айтарлықтай зиянын тигізетінін айтқанын жазғанбыз.