LRT маңынан тауып алған патрон бір жылдан кейін астаналық жігіттің сотталуына себеп болды

Бас прокуратураның мәліметінше, шығармашылық салада жұмыс істейтін жас жігіт салынып жатқан LRT нысанының маңынан бір патрон тауып алған. Ол оны түсірілімге арналған реквизит ретінде пайдалануға болады деп ойлап, рюкзагына салып қойған. Кейін бұл туралы мүлде ұмытып кеткен.

Бір жылдан соң астаналық Алматыға ұшу үшін әуежайға келген кезде тексеру барысында рюкзагының қалтасынан әлгі патрон табылған.

Осыған байланысты сот оны оқ-дәріні заңсыз иемдену, сақтау және тасымалдау фактісі бойынша кінәлі деп танып, бір жылға бас бостандығын шектеу жазасын тағайындаған.

Алайда іс материалдары бойынша жас жігіттің патронды пайдалануды, біреуге беруді немесе сатуды көздегені анықталмаған. Оның жанынан қару да табылмаған және ешқандай зиян келмеген.

Бас прокуратураның түсіндіруінше, Қылмыстық кодекстің 10-бабына сәйкес, құрамында құқық бұзушылық белгілері болғанымен, қоғамдық қауіптілігі болмашы әрекет қылмыстық құқық бұзушылық болып саналмайды.

Осыны ескерген кассациялық сот істі әрекеттің болмашы сипатына байланысты қылмыстық құқық бұзушылық құрамы жоқ деп танып, өндірісті тоқтатқан.

Сот қоршаған ортаға ешқандай зиян келмегенін, тек бір ғана патрон табылғанын және оны қылмыстық мақсатта пайдалану ниеті болмағанын назарға алған.

Бас прокуратура кассациялық соттың бұл ұстанымымен келіскенін мәлімдеді.

Айта кетейік, бұған дейін Ақтөбе облысының тұрғыны өз үйінің қорасынан снарядтар тауып, оларды полицияға тапсырғаны үшін 181 950 теңге көлемінде сыйақы алған болатын.