Маңғыстаулық мұғалім ерекше балмұздақтың дайындалу әдісін жариялады

Маңғыстау облысындағы Туризм колледжінің өндірістік оқу шебері «Бүгін LIVE» бағдарламасына онлайн сұхбат беріп, авторлық тағамын таныстырды.

– 2024 жылы Тараз қаласында өтетін халықаралық жарысқа дайындалып жатқанбыз. Жарысқа қатысушылар алты елден өздерінің ұлттық тағамдарын ұсынды. Бізде сол кезде тек бауырсақ болды. Сол сәтте десерт ретінде ерекше нәрсе ұсыну туралы идея туындады. Осы мақсатпен сиырдың ірімшігі мен түйенің табиғи сүтінен дайындалған балмұздақ жасауды ұйғардым. Нәтижесі өте тамаша болды. Мен қасымдағы студентімді осы рецепт бойынша дайындап, үйреттім де, жарысқа қатыстық, – дейді Еламан Нұрай.

Төрешілер де ерекше балмұздақты жоғары бағалапты.

– Төрешілер балмұздақтың дәмін татқан соң қатты таң қалды. Олар балмұздақты жоғары бағалап, тіпті оның патентін алу қажеттігін айтты. Осы балмұздақтың арқасында біз жарыста бірінші орынға ие болдық, – дейді маман.

Еламан Нұрай енді авторлық туындысын нарықта кеңінен таратуды көздеп отыр.

– Алдағы уақытта осы өнімді нарыққа шығаруды жоспарлап отырмын. Қазір тапсырыстар қабылдап жатырмын, алайда өнімді көп мөлшерде өндіре алатын кәсіпорным жоқ. Қазіргі таңда Ақтау қаласынан көптеп тапсырыс алып, өзім дайындап жіберіп жатырмын. Сонымен қатар, Атырау мен Ақтөбе қалаларынан да тапсырыстар келіп түсті. Бұл қалаларға тәжірибе ретінде дайын өнімдерді жіберіп көрдім, бәрі жақсы болды. Кәсіпті дөңгелетіп, әрі қарай кеңейту жоспарда бар, – дейді педагог.

Десерт авторы жаңа тағамның дайындалу әдісін түсіндірді.

– Балмұздақты сиырдың ірімшігі, түйенің сүті және балқаймақты араластыра отырып дайындаймын. 100 адамға жететіндей мөлшердегі балмұздақты жасауға шамамен 1 сағат уақыт кетеді, – дейді ол.

Айта кетейік, TurkicSkills-2025 чемпионаты аясында өткен халықаралық «Caspian» фестивалінің көрмесінде Маңғыстау туризм колледжінің өндірістік оқу шебері Нұрай Еламан өз авторлық тағамын таныстырды.