Маңғыстаулық студенттер тары қосылған кофе сусынын әзірледі

Маңғыстаулық студенттер тарыдан кофе, жантақтан шай дайындаудың жаңа технологиясын әзірледі.

Олардың бұл жаңалығы халықаралық «Caspian Fest» фестивалінде көпшілікке таныстырылды. Жастар енді өз өнімдерін патенттеуді жоспарлап отыр. Ресми тіркеуден кейін жаңа сусындар мейрамханалар мен қонақүйлерге жеткізілмек. Болашақ мамандар ұлттық тағамдардың дайындалу тәсілін терең меңгеріп, ұлтымыздың  қонақжай мәдениетін  кеңінен насихаттауға ниетті.

Сұлтанбек Қайрақбай — болашақ технолог-менеджер. Үшінші курс студенті аспаз, даяшы, бармен және бариста кәсібінің  қыр-сырын меңгерген. Алғашқылардың бірі болып арабика негізінде тары, сүт және мұз қосылған авторлық сусын әзірледі. Айтуынша, мұнда артық қоспа жоқ. Қарапайым ингредиенттер өзара үйлескенде ерекше дәм пайда болады. 

Сұлтанбек Қайрақбай, студент:

- Көп жерлерде тарыдан кофе жасаған кезде бұл салқын емес ыстық күйінде жүреді. Сол себепті бұл ыстық кофеге тарыны салған кезде тары өзінің дәмі мен иісін аша алмайды жақсы жағынан. Біздің жасау ерекшелігіміз тарыны сүтке алдын ала бұқтырып қоямыз. Сегіз немесе он екі сағатқа кем дегенде. Одан кейін біз кофеге сүтке экспрессо араластыру арқылы бұл кофені жасаймыз.

Тағы бір ерекше сусын — жантақ қосылған салқын шай. Өсімдік табиғи құндылығын жоғалтпас үшін алты сағаттай тұндырып қою қажет. Кейін сүзілген тұнба салқындатылып, арнайы қоспалармен толықтырылады. Міндетті түрде мұз, алмұрт шырыны, лайм және жалбыз қосылады. Дәл осы ингредиенттер жантақ шайына ерекше дәм береді. Ал басқа қоспалар бұған үйлеспейді. Маңғыстау облысында 26 колледж жұмыс істейді. Туризм және сервис саласын таңдайтын жастар қатары артқан.

Құралай Жарылғасова, білім басқармасы оқу-әдістемелік орталығының бөлім басшысы:

- Өңірдегі техникалық және кәсіптік білім беру ұйымдарындағы дайындалатын жұмысшы мамандарына көптеген көңіл бөлінді, ден қойылды деп айтсақ болады. Олардың шеберлігін арттыру мақсатында колледждерде құзырет орталықтары жұмыс істейді. Студенттер сол құзырет орталықтарында өздерінің білім-білігін арттыру үшін кәсіби шеберлігін арттыру үшін кез келген уақытта дайындық жүргізе алады.

Қазір өңірдегі оқу орындары 96 мамандық және 129 біліктілік бойынша кадр даярлайды. Сұранысқа ие бағыттардың қатарында туризм ғана емес, автосервис, электрмонтаж және теміржол саласы бар.

Қарлығаш Қасиетова, Тамара Степанова, Ринат Досалиев