Маркет платформасы: құрылыс компаниялары үш жылға дейін пәтер бағасын өсірмейді

«Отбасы банк» АҚ басқарма төрағасы Ләззат Ибрагимова бұл шаралар азаматтарға жеке баспана алуға мүмкіндік беретін бағдарламалар қатарын кеңейтетінін айтты.

—  Мемлекет басшысы Қасым-Жомарт Кемелұлы Тоқаевтың тапсырмасы бойынша Үкімет халықтың өмір сүру сапасын арттыруға бағытталған нақты шаралар қабылдады. Соңғы аптада азаматтарда ипотека рәсімдеу бойынша қиындықтар туындап жатқаны бәріңізге мәлім. Осыған байланысты Үкімет тұрғын үй құрылыс жинақ жүйесін қолдау туралы шешім қабылдады.  Келешекте халыққа баспана қолжетімді болуы үшін ипотекалық несие көлемі екі есе артты. Қараша айында «Наурыз1» және «Наурыз жұмыскер» бағдарламалары басталады. Жалпы, 500 млрд теңге көлемінде несие беріледі, — деді «Отбасы банк» АҚ басқарма төрағасы.

Бұған қоса, Ләззат Ибрагимова «Әскери баспана» бағдарламасы қайта іске қосылады. Осы бағдарламаның арқасында шамамен 7 мың әскери қызметкер дайын пәтер сатып ала ала алатынын айтты.
Басқарма төрағасының сөзінше, барлық пәтер Баспана маркет платформасы арқылы сатылады. Пәтерлердің бағасы мемлекет бақылауында болады.

— Қазіргі таңда құрылыс компаниялары 36 айға дейін пәтер бағасын өсірмейтіні туралы алдын ала келісімшартқа отырады, — деді ол.

Айта кетейік, Қазақстанда ипотека бойынша мөлшерлемені 25%-дан 20%-ға дейін төмендету нормасының күші уақытша тоқтатылды.