Мәжіліс Құрылыс кодексін мақұлдады

АСТАНА, 26 қараша – Sputnik. Мәжіліс депутаттары Құрылыс кодексін мақұлдап, сенаттың қарауына жіберді, деп хабарлайды Sputnik Қазақстан тілшісі.

Жаңа құрылыс кодексінде цифрландыру мәселелеріне ерекше назар аударылған. Бірыңғай құрылыс порталында нысандар құрылысының толық циклі тіркеледі. Олардың әрқайсысына UNO бірегей нысан нөмірі беріледі. Бұдан бөлек, цифрландыру шеңберінде лицензиаттардың бірыңғай цифрлық тізілімі жасалады. Онда әрбір субъект туралы, оның тәжірибесі, біліктілігі, материалдық ресурсы, салалық сарапшылардың бар-жоғы көрсетіледі.

Сарапшылар мен инженерлік-техникалық қызметкерлерді аттестаттау жүйесі де жаңартылады. Еуропалық одақ стандарттары бойынша сертификаттауды енгізу жоспарланып отыр.

Сондай-ақ кодексте ақпараттық модельдеу (BIM) технологияларын қолдану міндеттеледі, бұл нысандарды жобалау мен салу сапасын арттыруға мүмкіндік береді.

Кодекстің негізгі жаңалықтары:

сейсмикалық қауіпті аумақтардағы құрылыс талаптары күшейту;

қала құрылысын жоспарлау кезінде сейсмикалық микроаймақтау карталарын міндетті есепке алу;

мемлекеттік сәулет-құрылыс бақылау органдары және ТЖМ салынған нысандарды қабылдауға қатысуы;

тірек құрылымдарға, шатырға және қасбетке қатысты ең төменгі кепіл мерзімін 10 жылға дейін, жалпы құрылыс нысанына тиісті кепіл мерзімін – 5 жылға дейін ұзарту;

жергіліткі мәслихаттарға елді мекендерді дамыту тұжырымдамаларын (мастер-жоспар) келісу өкілеттігін беру;

елді мекеннің бас жоспарын әзірлеу мерзімін жиырма жылға дейін, ал егжей-тегжейлі жоспарлауға бес жылға дейінгі мерзімді бекіту;

техникалық тапсырыс беруші және ұлттық нормалау институттарын енгізу.

Кодекске сәйкес, техникалық тапсырыс беруші институты бір субъектіге нысанды жоспарлаудан бастап оны пайдалануға беруге дейін толыққанды жүзеге асыруға мүмкіндік береді.