Миллиардтық касса және жаңа премьералар қазақстандық фильмдер прокатта қанша жинады

Қазан айындағы отандық фильмдердің кассалық түсімін "7 қарақшы" туындысы бастап тұр: үш апталық прокатта картина 730 миллион теңге табыс тапты. Дегенмен, бастапқыда басты үміткерлердің қатарына қосылмаған "Жарығым-ай" мелодрамасы жалпы касса бойынша оны басып озды. Tengri Life кинотеатрларда қай қазақстандық фильмдер көрсетіліп жатқанын, олардың қанша табыс тапқанын және миллиардтық межеге кімнің жақындағанын баяндайды.

Қазақстан кинотеатрларында не көрсетіліп жатыр және қанша табыс тапты?

8–11 қазандағы уик-энд қорытындысы бойынша Қазақстан прокатында "7 қарақшы" фильмі бірінші орынды сақтап қалды. Екінші орынға жаңадан шыққан "1+3" комедиясы жайғасса, үшінші сатыны "Жарығым-ай" мелодрамасы иеленді. Бұл ретте төрт күн ішінде бірде-бір туынды 100 миллион теңгеден артық жинай алмады, деп хабарлайды Forbes.kz.

Дереккөз: Forbes.kz

"14 күн": комедия миллиард межеден асты

"14 күн" комедиясы уик-энд рейтингінде біртіндеп төмендеп келе жатқанына қарамастан, әлі де көрермен жинауын жалғастырып жатыр. Прокаттың жетінші аптасында фильм 24 миллион теңге тапса, жалпы кассалық түсімі 1 миллиард 72 миллион теңгеге жетті.

Arasha.kz-тің 2025 жылғы қарашадағы мәліметтері бойынша, 10-шы орында "Бизнес по-казахски в Индии" (1 281 598 850 теңге), 11-ші орында "Таптым-ау сені - 2" (1 198 850 506 теңге) тұр. "14 күн" фильміне "Таптым-ау сені - 2" туындысын басып озып, 11-ші орынға шығу үшін шамамен 127 миллион теңге жетпейді. Ал алғашқы ондыққа кіру үшін "Бизнес по-казахски в Индии" фильмінің түсімінен асып түсу керек, яғни тағы 210 миллион теңгедей жинау қажет.

"7 қарақшы": шығынды ақтау үшін қанша қаражат керек?

"7 қарақшы" фильмі үш апта қатарынан Қазақстан прокатында көш бастап тұр. 8–11 қазан аралығындағы демалыс күндері ол тағы 96 миллион теңге жинап, жалпы түсімі 730 миллионға жетті.

Бұл ретте картинаның бюджеті 720 миллион теңгені құрайды. Кассалық түсім бұл сомадан 10 миллионға асып кетсе де, әзірге шығын толық ақталды деуге ерте. Кинотеатрлардың кассалық жиыны авторлардың таза табысымен тең емес: түсімнің бір бөлігі прокатқа қатысушыларда қалады, ал фильмнің түпкілікті экономикасы өзге де шығындарға байланысты болады.

"Жарығым-ай": бұл фильмді неге іздейді?

"Жарығым-ай" мелодрамасы прокаттың бесінші аптасында да көрермендерді қызықтыруын тоқтатар емес. 8–11 қазандағы демалыс күндері фильм 73 миллион теңге жинап, жалпы кассасы 822 миллионға жетті.

Осылайша, жиынтық түсім бойынша картина "7 қарақшыдан" озып кетті, дегенмен соңғысы жекелеген уик-энд нәтижелері бойынша әлі де бірінші орында тұр.

"1+3": жаңа қазақстандық комедия прокатқа шықты

Дархан Саркеновтің "1+3" комедиясы Қазақстан прокатына 8 қазанда шығып, бірден уик-энд қорытындысы бойынша екінші орынды иеленді. Прокаттың алғашқы төрт күнінде картина 80 миллион теңге жинады, деп хабарлайды Forbes.kz. Фильмнің жалпы түсімі әзірге жарияланған жоқ.

"Қара алтын" және өзге де отандық премьералар

"Қара алтын" драмасы прокаттың үш аптасында 197 миллион теңге жинады. Оның 23 миллионы 24–27 қыркүйектегі демалыс күндеріне тиесілі. Бұл 27 қыркүйектегі жағдай бойынша алынған мәліметтер.

Картина шынайы оқиғаларға негізделген және Қазақстан тәуелсіздігінің алғашқы жылдарында қаржылық қиындықтар мен қатаң бәсекелестікке қарамастан, құрылыс бизнесінен мұнай саласына ауысуға бел буған кәсіпкер Қасым Исағалиев туралы баяндайды.

Барлық уақыттағы ең көп касса жинаған қазақстандық фильмдер

Қазақстандық кинопрокаттың көшбасшысы ретінде түсімі 1,83 миллиард теңгеден асқан "Таптым-ау сені" романтикалық комедиясы қалып отыр. Екінші орында "Ыстық ұя" драмасы, ал үшінші орында "Дәстүр" фильмі тұр.

Бұған дейін Мәдениет министрлігі бюджет қаражатына түсірілген қазақстандық фильмдердің неге прокатта өзін-өзі ақтамайтынын түсіндірген болатын.

Бізді Google-дың негізгі дереккөздер тізіміне қосыңыз

Қосу