Мобильді аударымдар бойынша жауап беруге 30 күн уақыт беріледі

Мобильді аударымдарды тексеру бойынша хабарлама алған қазақстандықтарға түсініктеме беру немесе декларация тапсыру үшін 30 жұмыс күні беріледі.
Бұл туралы қаржы вице-министрі Ержан Біржанов мәлімдеді. Оның айтуынша, салық органдары тиісті хабарламаларды жолдауды бастап кеткен.

«Жұмыс жүріп жатыр. Біз барлық санат бойынша хабарлама жіберіп жатырмыз. Оның нақты мерзімі бар – 30 жұмыс күні. Қазір салық төлеушілердің реакциясын бақылап отырмыз», – деді Біржанов Сенат кулуарында.

Журналистер хабарлама алған азаматтарға қандай шаралар қолданылуы мүмкін екенін сұрады.

Вице-министрдің сөзінше, басты мақсат – азаматтарға өз жағдайын түсіндіруге мүмкіндік беру.

«Біз декларация тапсыруға немесе түсініктеме беруге мүмкіндік ұсынамыз. Қандай да бір айыппұл санкциялары, шектеулер немесе банктік айыппұлдар қолданылмайды», – деді ол.

Бұған дейін салық органдары тіркелмеген кәсіпкерлік қызметпен айналысуы мүмкін азаматтардың тізімін қалыптастыра бастағаны хабарланған еді. Хабарламаларды мамыр айында жіберу жоспарланған болатын.

Еске салайық, мобильді аударымдарды тексеру кезінде салық органдары үш негізгі критерийге назар аударады:

– 100 және одан көп әртүрлі тұлғадан аударым түсуі;
– аударымдардың 3 ай қатарынан қайталануы;
– жалпы сомасы 1 020 000 теңгеден асуы.

Осы талаптарға сәйкес келетін аударымдар тіркелмеген кәсіпкерлік қызмет белгісі ретінде қарастырылуы мүмкін.