Моңғолия қар барысын сақтау жөніндегі халықаралық қор құрамына қосылады

Аталған қорға қосылу Моңғолияға қар барысы мен оның тіршілік ету ортасын қорғауды күшейтуге, сондай-ақ қар барысы мекендейтін аймақтарда тұратын малшы қауымдастықтарының өмір сүру сапасын жақсартуға мүмкіндік береді.

Жеті ірі жабайы мысық түрін сақтау мақсатында Халықаралық ірі мысықтар альянсын (IBCA) құру бастамасын алғаш болып Үндістан Республикасы көтерген болатын. Бұл ретте Моңғолия бұл қорға қосылуға алғаш рет 2023 жылы өтініш берген.

Сонымен қатар Моңғолия Халықаралық күн альянсына қосылатыны анықталды. Моңғолия Үкіметі елдің Халықаралық күн альянсын (МСА) құру жөніндегі Бас келісімге қосылуын мақұлдап, Энергетика министрлігін өзінің өкілетті органы ретінде тағайындады.

Аталмыш альянс 2015 жылы құрылған. Альянстың штаб-пәтері Үндістанның Харьяна штатындағы Гургаон қаласында орналасқан. Халықаралық күн альянсы Жаңартылатын энергия көздері жөніндегі халықаралық агенттікпен (IRENA) бәсекелеспейді, алайда күн энергиясына бай елдерде ортақ мәселелерді шешетін жобалар мен бағдарламаларға қаржы ресурстарын жұмылдыруға көмек көрсетуге баса назар аударады.

Альянсқа қосылу Моңғолияға мынадай артықшылықтар береді:

Жаңартылатын энергия көздері саласында өңірлік ынтымақтастықты дамыту; Күн энергиясын пайдалануға қолдау көрсету; Өндірісті ұлғайту; Экологиялық таза технологияларды енгізу; Парниктік газдар шығарындыларын азайту.

Бұдан бұрын Моңғолия мемлекеттік үлесі бар компаниялардың санын қысқартатыны айтылды.