Moody’s Ratings Қазақстанның жалпы сақтандыру секторына позитивті болжам жариялады

Бұл туралы Қазақстан қаржыгерлер қауымдастығы талдау материалында айтылған. Талдау орталығының мәліметінше, 2026 жылы меншікті капиталдың орташа өлшенген табыстылығы 20 пайыздан асады. Бұл жоғары пайыздық мөлшерлемелер аясындағы жалпы сақтандыру компанияларының жақсы инвестициялық кірісін, сондай-ақ тәуекелдерді бағалау және тарифтік саясатты жетілдіру көрсеткіштерінің жақсаруын көрсетеді. Қосымша қолдау факторы ретінде қолайлы реттеуші орта аталады.

Қазақстанның жалпы сақтандыру секторының негізгі драйверлеріне шолу:

— Макроэкономикалық орта жақсарып келеді. Moody’s агенттігі 2026-2027 жылдары Қазақстанда тұрақты экономикалық өсім жалғасады деп күтеді. Бұл корпоративтік және бөлшек сақтандыруға сұраныстың артуына ықпал етеді.

— Сақтандыру саласының табысы жоғары деңгейде қала береді. Өйткені компаниялар тәуекелдерді бұрынғыдан дәлірек бағалай бастады. 2026–2027 жылдары инфляция төмендеп, шығындар тұрақталады деп күтіледі. Сонымен қатар пайыздық мөлшерлемелер жоғары болғандықтан, компаниялардың инвестициядан түсетін табысы да артады.

— Активтер тәуекелі тұрақты деңгейде сақталады. Активтердің 70 пайыздан астамы тіркелген кірісі бар инвестициялық санаттағы бағалы қағаздарға, негізінен мемлекеттік және квазимемлекеттік бағалы қағаздарға орналастырылған.

— Капитал жеткіліктілігі тұрақты. Капиталдың ішкі генерациясының жоғары болуы және төлем қабілеттілігінің реттеушілік көрсеткіштерінің жоғары деңгейі сақтандырушылардың қаржылық тұрақтылығын қолдайды.

— Реттеушілік және ESG тәуекелдері жақсарып келеді. Реттеуші органдар мен Үкіметтің бастамалары сақтанушылардың құқықтарын қорғауды күшейтіп, сақтандыру нарығының ұзақ мерзімді өсуіне қолайлы жағдай қалыптастыруға ықпал етеді.

Сонымен қатар, Moody’s Ratings Қазақстандағы жалпы сақтандыру секторын дамытатын негізгі факторларды да атап өткен. Толық ақпаратты сілтеме арқылы оқи аласыз. 

Айта кетейік, Қазақстанда сақтандыру және қор нарығын дамытудың 2030 жылға дейінгі бағдарламасы әзірленеді.